Astana men Almatyda tūratyn 150 soǧys ardagerı tötenşe jaǧdai bolǧanda dabyl qaǧatyn elektrondy qūrylǧymen qamtamasyz etıletın boldy. Būl turaly Ūlttyq käsıpkerler palatasy ūiymdastyrǧan baspasöz mäslihatynda aityldy.
Jiynǧa Ūlttyq käsıpkerler palatasy basqarma töraǧasynyŋ orynbasary Nūrjan Ältaev, respublikalyq ardagerler ūiymy ortalyq keŋesınıŋ töraǧasy Ömırzaq Ozǧanbaev jäne «Ömır joly» jobasynyŋ ökılı Iliias Omarov qatysyp, jurnalisterdıŋ sūraǧyna jauap berdı.
«Ömır joly» atty äleumettık joba aiasynda paida bolǧan GPS-navigatorlary Jeŋıs künı merekesı qarsaŋynda ardagerlerımızge tosyn syi bolyp otyr. Būl – kärılık jeŋıp, küş-quaty azaiǧan qartaŋ adamdarǧa taptyrmas kömekşı qūrylǧy. Eger qariia jalǧyz qalǧanda nemese köşede kele jatyp kenet syrqattanyp, ömırıne qandai da bır qauıp tönse, osy qūrylǧydaǧy «SOS» belgısı bar jedel şaqyru tüimeşesın bassa bolǧany, dabyl nüktesı bırden bıryŋǧai kömek ortalyǧynyŋ aqparattyq bazasyna kelıp tüsedı. «Qondyrǧydaǧy tüimeşenı basqan kezde sol adamnyŋ qaida tūratyny, jasy qanşada ekendıgı, qandai syrqatpen auyratyny, tıptı jaqyn tuystarynyŋ telefon nömırı monitorǧa şyǧa keledı.
Operatorlar bırden şaqyru joldaǧan adammen tıldesuge tyrysady. Qūrylǧy dauys küşeitkışımen qamtamasyz etılgen. Jauap alu barysynda tüimeşenıŋ baiqausyzda basylyp ketpegenı anyqtalady. Al eger şynymen de qondyrǧy iesınıŋ ömırıne qauıp töngen bolsa, onda jedel järdemge, polisiiaǧa, basqa da organdarǧa nemese tuǧan-tuysqandaryna habar berıledı. Osylaişa, qarttarǧa der kezınde kömek körsetıletın bolady» deidı Iliias Omarov.
Qūrylǧynyŋ negızgı apparaty ardagerdıŋ üiındegı telefonǧa nemese qaltafonǧa ornatylady. «SOS» degen belgısı bar ekınşı bölıgı bılezık retınde qolǧa nemese alqa ıspettı moiynǧa taǧylady. Iаǧni adam qaida jürse de, özımen bırge alyp jüruge yŋǧaily.
Mūndai innovasiialyq qūrylǧy Amerikada jäne Europa elderınde 30 jyldan berı qoldanylyp keledı eken. Reseide osydan ekı jyl būryn ıske qosylǧan. Al elımızde ötken jyldan berı qolǧa alyna bastaǧan. Byltyr ötkızılgen «Atameken Start-up» baiqauynda osy «Ömır joly» jobasy üzdık dep tanylǧan eken. Endı mıne, Ūlttyq käsıpkerler palatasy biznestıŋ äleumettık jauapkerşılıgı retınde elımızdegı soǧys ardagerlerıne qūrylǧyny tegın tarata bastady.
ŪKP basqarma töraǧasynyŋ orynbasary Nūrjan Ältaevtyŋ aituynşa, biznes qauymdastyq Ūly jeŋıstıŋ 70 jyldyǧyna deiın soǧys ardagerlerın tügel osy qūrylǧymen qamtamasyz etudı közdep otyr.
Qymbat TOQTAMŪRAT
