Polşa Prezidentı Andjei Duda EKSPO körmesı aiasynda ötkızılgen Polşanyŋ ūlttyq künıne qatysty.
Arnaiy resmi saparmen kelgen joǧary märtebelı qonaq älem elderınıŋ örkendeuı üşın jaŋǧyrmaly energiia közderınıŋ damuy asa maŋyzdy ekendıgın aitty. Onyŋ aituynşa, ekonomika, sauda, önerkäsıp jäne basqa salalardyŋ qyzmetı energetikanyŋ damuyna tıkelei täueldı.
– Bügınde balamaly energiia közderı arqyly energetikalyq täuelsızdıktı qamtamasyz etuge bolady. «EKSPO-2017» körmesıne qatysqan Polşanyŋ jergılıktı bilıgı, ǧalymdary men sarapşylary bolaşaqta qoldanatyn qūndy täjıribe jinaqtaǧanyna senımdımın. Qazaqstan Ükımetı men barşa halqyn elordadaǧy körmenı sättı ötkızuımen şyn jürekten qūttyqtaimyn. Körme Ortalyq Aziia aumaǧynda alǧaş ret ötkızılude. Būl – soŋǧy 26 jyl aralyǧyndaǧy el jetıstıgınıŋ aiqyn dälelı. Osyndai joǧary deŋgeide ūiymdastyrylǧan şaraǧa qatysu – bız üşın ülken märtebe, – dedı Andjei Duda.
Polşa pavilonynyŋ taqyryby «Tabiǧat kezeŋderı» dep atalady. Memleket körme aiasynda «jasyl» energiia salasyndaǧy jetıstıkter turaly tyŋ aqparattar ūsynuda.
Aita keteiık, Polşa «EKSPO-2022» halyqaralyq mamandandyrylǧan körmesın Lodz qalasynda ūiymdastyruǧa jäne ötkızuge ötınım berdı.
