1 mausym – Halyqaralyq balalardy qorǧau künı qarsaŋynda elordanyŋ türlı mekemelerı qaiyrymdylyq şaralaryn ūiymdastyryp, büldırşınderdı quantuǧa tyrysty. Sondai jiynnyŋ bırı Balalardy oŋaltu ūlttyq ortalyǧynda öttı. «Nūr Otan» partiiasy Astana qalalyq filialynyŋ mūryndyq boluymen qoiylǧan merekelık konsert barysynda baldyrǧandar köl-kösır şattyqqa kenelıp, keremet äserge bölendı.
– Bügınde erekşe qajettılıktı talap etetın balalardy äleumettendıru maqsatynda memleket tarapynan tyndyrymdy şarualar atqaryluda. Osy oraida «Nūr Otan» partiiasy da qalys qalǧan joq. Bız ıske asyryp jatqan 8 partiialyq jobanyŋ bırı «Kedergısız keleşek» dep atalady. Sol arqyly medisinalyq kömekke mūqtaj säbilerge qol ūşyn berıp, olardy qoǧamǧa beiımdegımız keledı. Mäselen, mümkındıgı şekteulı jandarǧa arnalǧan lift, pandus salyp, jürıp-tūrularyna qolaily jaǧdai jasauda jūmystar jürgızudemız. Mūndai sauapty tırlıkke Astana qalasynyŋ Käsıpkerler qauymdastyǧy, Qazaqstan Respublikasy elşılerınıŋ äielderı kluby sekıldı ūiymdar men Parlament jäne jergılıktı mäslihat deputattaryn tarttyq, – dedı «Nūr Otan» partiiasy Astana qalalyq filialy töraǧasynyŋ orynbasary Vladislav Sergeev.
Dumandy şaraǧa Astana qalasy Käsıpkerler qauymdastyǧynyŋ vise-prezidentı Hanzada Baltaeva, Qazaqstan Respublikasy elşılerınıŋ äielderı kluby prezidentı Sofiia Bakuridze, Qazaqstandyq densaulyq saqtau qyzmetkerlerınıŋ salalyq käsıpodaǧy elordalyq filialy töraǧasy Baqytjan Täjıbai qatysty. Olar oŋaltu ortalyǧyna velosipedter tartu etıp, emdeluşı balaqailarǧa oiynşyqtar syilady.
Konserttıŋ soŋy järmeŋkege ūlasty. Onda sal auryna şaldyqqan 300-ge juyq bala öz qolynan şyqqan būiymdardy ūsyndy. Järmeŋkeden tüsken qarjy tügeldei ūlttyq ortalyqtyŋ qoryna audarylady.
Botagöz MARATQYZY
