Keşe Densaulyq saqtau jäne äleumettık damu ministrı Tamara Düisenova Astanadaǧy qarttar üiıne baryp, Ūly Otan soǧysynyŋ ardagerlerı men tyl eŋbekkerlerın Jeŋıs künımen qūttyqtady. İgı şaraǧa elorda äkımınıŋ orynbasary Andrei Lukin, Respublikalyq ardagerler ūiymy Ortalyq keŋesınıŋ töraǧasy Ömırzaq Ozǧanbaev jäne Parlament deputattary qatysty.
– 1945 jyldyŋ 9 mamyry şejıre paraqtaryna jazylyp, tarihqa ainaldy. Sızder maidan şebınde el ırgesın qorǧap, jaudy jeŋdıŋızder. Soǧystan keiın qiraǧan şaruaşylyqty qaita qalpyna keltırdıŋızder. Osylaişa patriotizmnıŋ naǧyz ülgısın körsetıp, täuelsız Qazaqstannyŋ berık negızın qaladyŋyzdar. Sol üşın sızderge mäŋgı qaryzdarmyz. Öskeleŋ ūrpaq erlıkterıŋızdı eşqaşan ūmytpaidy, – dedı Tamara Düisenova.
Qarttar men mügedekterge arnalǧan medisinalyq-äleumettık mekemenıŋ direktory Kenjebolat Bäpışevtıŋ aituynşa, bügınde mūnda 304 kısı tūrady. Onyŋ 4-euı – Ūly Otan soǧysynyŋ ardagerlerı, 16-sy – olarǧa teŋestırılgen azamattar, al 34-ı – tyl eŋbekkerlerı. Qariialar jyl saiyn Jeŋıs künın toilap, «Ardager» alleiasyna köşet otyrǧyzudy ürdıske ainaldyrypty. Būl joly da ızgı dästür ūmytylmady. Saltanatty jiynnan keiın qonaqtar men jauynger ata-äjeler aǧaş eguge kırıstı. Alǧaşqy şybyqty ministr men Ūly Otan soǧysynyŋ ardagerı Oleg Linnik qadady.
Kezdesu soŋynda sarbazdar men studentter aspanǧa Jeŋıs şarlaryn ūşyrdy. Al «Naz» memlekettık bi teatrynyŋ ärtısterı, ürmelı orkestr jäne №17 mektep-gimnaziianyŋ şäkırtterı merekelık konsert qoidy.
Botagöz MARATQYZY
