Serbiia astanasy Belgradtaǧy bylǧary qolǧap şeberlerınıŋ jeŋısı qazaq boksy janküierlerın bır jelpıntıp tastady. Jalpykomandalyq esepte 2 altyn, 2 kümıs jäne 1 qolamen 2-orynǧa taban tıregen bokstan ūlttyq qūramanyŋ būl jeŋısı şynynda Tokio Olimpiadasyndaǧy sätsızdıktıŋ ornyn toltyrǧandai.
Memleket basşysy Qasym-Jomart Toqaev Belgradtaǧy bokstan älem chempionatynda jülde alǧan qazaqstandyq boksşylardy qūttyqtady.
«Bokstan älem chempionatynda altyn alǧan Temırtas Jüsıpov pen Säken Bibosynovty, kümıs oljalaǧan Mahmūd Sabyrhan men Serık Temırjanovty jäne ūlttyq qūrama kapitany, qola jüldeger Abylaihan Jüsıpovtı şyn jürekten qūttyqtaimyn! Eldıŋ atyn şyǧarǧan erlerımızge tabys tıleimın!» dep jazdy Prezident Tvitterdeıg paraqşasynda.
2 jylda dünie jüzınıŋ eŋ üzdık boksşysyn anyqtaityn dübırlı dodaǧa Qazaqstannyŋ bokstan ūlttyq qūramasy tolyq qūrammen qatysty. Onyŋ ışınde 4 boksşy aqtyq synǧa şyqty.
Alǧaş bolyp aqtyq synda 48 kelıge deiıngı salmaq därejesınde el namysyn qorǧaǧan Temırtas Jüsıpov qūrama qorjynyna alǧaşqy altyn medaldı saldy. Ol şarşy alaŋda tai boksşysy Vuttichai Iýrachaidan basym tüstı. Sol sekıldı älem chempiony atanu üşın amerikalyq boksşymen qolǧap tüiıstırgen Säken Bibosynov ta jeŋıstıŋ biık tūǧyrynan körındı. Ä degennen jerebe öz salmaǧynda eŋ üzdık boksşy sanalatyn özbek Hasanboi Dusmatovpen jūp etkende, qazaq janküierlerı ışten tynǧan. Bıraq myŋ ailaly qarsylasyna qarsy jekpe-jekte är qadamyn aŋdap basqan S.Bibosynov jeŋıske jettı. Alǧaşqy ärı aqtyq synǧa bergısız jekpe-jekten keiın-aq janküierler Säkennıŋ däl osy chempionatta jüldesız qalmaitynyna senımdı bolǧan. Onyŋ şyn mänınde myqty boksşy ekenın aqtyq synda özıne qarsylas atanǧan amerikalyq Rosko Hilldıŋ özı küllı älem aldynda moiyndady.
Aqtyq synda 54 jäne 57 kelı salmaq därejelerınde el namysyn qorǧaǧan Mahmūd Sabyrhan men Serık Temırjanov kümıstı qanaǧat tūtty. Al jartylai finalda japon boksşysy Sevonres Okadzavaǧa jol bergen Abylaihan Jüsıpov älem chempionatynyŋ qola jüldegerı atandy. Abylaihan Jüsıpov 2019 jyly Ekaterinburgte ötken älem chempionatynda da qola jüldege ie bolǧan edı. Sol joly, keiınnen Tokio Olimpiadasynda qolany qanaǧat etken Säken Bibosynov Belgradta jeŋıstıŋ eŋ biık tūǧyryna köterıldı.
Keşe elorda äuejaiynda boks janküierlerı älem chempionatynyŋ jüldegerlerın qūrmet-qoşemetpen kütıp aldy.
