Soltüstık Kavkaz halqynyŋ qazaq elıne jer audarylǧanyna 75 jyl tolyp otyr. Jaqynda osy oqiǧaǧa orai Alǧys aitu künı qarsaŋynda elordadaǧy Dostyq üiınde arnaiy eske alu jiyny öttı.
«Vainah» şeşen-inguş etnomädeni ortalyǧy» ūiymdastyrǧan ıs-şaranyŋ basty maqsaty – ötken tarihqa kezektı ret üŋılıp, estelıkterdı saqtau, qazaq halqynyŋ keŋpeiıldıgın, darhandyǧyn, qonaqjailyǧyn kezektı ret paş ete otyryp, sol tūstaǧy qiyn-qystau kezeŋde körsetken kömegı üşın alǧys bıldıru.
Jiyn barysynda jastar tobynyŋ teatrlanǧan körınısı men arnaiy äzırlengen tarihi beinefilm jūrtşylyq nazaryna ūsynyldy.
– Ata-babamyzdyŋ jer audarylyp kelgenıne 75 jyl boldy. Al özım osy qazaq jerınde tuyp östım, biyl 68 jasqa kelıp otyrmyn. Mūsylman ärı mınezı keŋ halyq bolǧan körgen qiyndyqtarymyzdyŋ jeŋıldeuıne ülken kömegın tigızdı. Sol bır kezeŋ qiyn-qystau uaqyt bolsa da bızdı özgelerden bölıp-jarmai, bır üidıŋ balasyndai bırge östık, – dedı Selinograd audandyq Dostyq üiınıŋ basşysy Magomed Sukalov.
Aita keteiık, türlı zertteuler boiynşa 1944 jyldyŋ 23 aqpany men 9 nauryz aralyǧynda Şeşen-inguş AKSR aumaǧynan, sondai-aq oǧan ırgeles jatqan audandardan Qazaqstan men Qyrǧyzstanǧa şamamen 500-650 myŋ adam jer audarylǧan eken.
