2019 jylǧa arnalǧan Astana qalasynyŋ biudjetınen köpbalaly jäne az qamtylǧan otbasylardy qoldauǧa qosymşa 90 mln teŋge bölu ūsynyldy. Jalpy qala biudjetın naqtylau kezınde äleumettık salaǧa qosymşa 1 mlrd 156,7 mln teŋge baǧyttau qarastyryldy. Keşe qalalyq qoǧamdyq keŋestıŋ otyrysynda Strategiialyq jäne biudjettık josparlau basqarmasynyŋ basşysy Rasul Orazǧūlov keŋes müşelerın biudjettegı özgerıstermen tanystyrdy.
Köpbalaly jäne az qamtylǧan otbasylardy qoldau şaralary bırneşe baǧytty qamtidy. Sonyŋ ışınde tūrǧyn üi kömegıne bölınetın qarjy ortaşa eseppen alǧanda 18 paiyzǧa artpaq. Atap aitqanda, būǧan biudjetten qosymşa 33,9 mln teŋge bölınbek. Sondai-aq üide tärbielenıp, oqityn mügedek balalardy materialdyq qoldauǧa 8 mln teŋge bölu josparlandy.
«Köpbalaly otbasylar men osyndai otbasylardan şyqqan balalardy qoldau şaralaryn jalǧastyru maqsatynda qazırgı kezde qūjattar paketı daiyndalyp jatyr. Ol daiyn bolǧan soŋ biudjettı naqtylaudyŋ kelesı otyrysyna şyǧarylady. Sebebı būl qūjatty äzırleu üşın säikes normativtı-qūqyqtyq aktılerge özgerısterdı engızu kerek. Özgerıster köpbalaly otbasylardyŋ balalary qoǧamdyq kölıkte jeŋıldıkpen jüru üşın, olardyŋ demalysyn ūiymdastyru, ystyq tamaqpen qamtamasyz etu üşın engızılmek» dedı Jūmyspen qamtu jäne äleumettık qorǧau basqarmasy basşysynyŋ orynbasary Artem Äbıldinov.
Osy aptada ötken Astana äkımı Baqyt Sūltanovtyŋ halyqqa esep beru kezdesuınde qala basşysyna tūrǧyndar tarapynan şaharda invataksi sanyn köbeitu turaly tılek aityldy. Būǧan tiıstı kölıkter sany 23-ten 30-ǧa deiın artatyny jaily jauap berıldı. Biylǧy biudjette invataksige qosymşa 35,5 mln teŋge bölu qarastyrylǧan eken.
Jalpy Jūmyspen qamtu jäne äleumettık qorǧau basqarmasyna 463,1 mln teŋge qosymşa bölınbek. Sonyŋ ışınde qarttar men mügedekterge medisinalyq-äleumettık mekemelerde qyzmet körsetu maqsatynda «Şarapat» mekemesıne 60 mln teŋge, Ekınşı düniejüzılık soǧystyŋ aiaqtalǧanyna 74 jyl toluyna jäne Auǧanstannan keŋes jauyngerlerı şyǧarylǧanynyŋ 30 jyldyǧyna orai atalǧan soǧys ardagerlerıne 63,8 mln teŋge bölu qarastyryldy. Ūly Otan soǧysyna qatysuşylardyŋ ärqaisysyna 500 myŋ teŋgeden, Auǧanstan ardagerlerıne 52 725 teŋgeden bır rettık materialdyq kömek berılmek.
№86 mektep-gimnaziiany kütıp-ūstauǧa qosymşa 150 mln teŋge bölu jäne qaladaǧy mektepter mūǧalımderınıŋ ädıstemelık jūmystaryna osynşama qarjy qarastyrylǧan. Biyl memleket qairatkerı, aqyn Säken Seifullinnıŋ tuǧanyna 125 jyl tolady. Tūlǧanyŋ mereitoiyn atap ötu üşın Mädeniet jäne sport basqarmasyna 10 mln teŋge bölınbek.
Baiqoŋyr jäne Saryarqa audandarynyŋ äkımdıkterıne tūrǧyn alaptardy abattandyryp, kögaldandyruǧa da qosymşa qarjy qarastyrylǧan. Qoǧamdyq keŋes müşelerı Almaty men Esıl audandary qosymşa qarjylandyru josparynda nege joqtyǧyn sūrady. Otyrysta biylǧy biudjette Almaty audanyna basqa audandarmen salystyrǧanda köbırek qarjy bölıngenı aityldy. Keŋes töraǧasy Sansyzbai Esılov: «Baiqoŋyr audany äkımınıŋ biylǧy halyqqa esep beru kezdesuıne qatystym. Būl audandaǧy mäseleler rasymen şaş etekten. Qaita qosymşa qarjy retınde audanǧa bölınıp otyrǧan 310 million teŋge az. Aqşany köbeitu kerek» dedı. Keŋestıŋ basqa da müşelerı baiandamaşy men otyrysqa qatysqan basqarmalardyŋ, audandardyŋ basşylaryna biudjet boiynşa sūraqtar qoidy. Biudjettı naqtylau kezınde qala tūrǧyndaryn qoldauǧa qatysty Astana äkımınıŋ keiıngı kezde bergen tapsyrmalary eskerıldı me dep sūrady.
«Osymen mäsele bıtken joq. Biudjet älı de naqtylanady. Sonda aitylǧan ūsynystaryŋyz ben syn-eskertpelerıŋız eskerıledı. Bız basqarmalardan qosymşa qarjy boiynşa ūsynystardy 6 aqpanǧa deiın qabyldadyq. Osy merzımnen keiın kelıp tüsken ötınışterdı engızudı ülgermedık. Ärine, qala basşysynyŋ tapsyrmalary oryndaluy üşın biudjetke tiıstı özgerıster engızıledı» dedı R.Orazǧūlov.
