Nūr-Sūltan qalasyndaǧy Ardagerler ortalyǧynyŋ mäjılıs zalynda qalalyq Ardagerler keŋesınıŋ plenumy öttı. Basqosuda 2021 jyldyŋ qorytyndylary jäne Memleket basşysy Qasym-Jomart Toqaevtyŋ «Jaŋa Qazaqstan: jaŋaru men jaŋǧyru joly» atty Joldauyna orai atqarylatyn ıs-şaralar talqylandy. Jiynǧa «Ardagerler ūiymy» RQB Ortalyq Keŋesınıŋ töraǧasy Baqtyqoja Izmūhambetov, Nūr-Sūltan qalasy Işkı saiasat basqarmasynyŋ basşysy Däuren Babamūratov qatysyp, söz söiledı.
Plenumnyŋ jūmysyn aşyp, baiandama jasaǧan qalalyq Ardagerler keŋesınıŋ töraǧasy Sansyzbai Esılov ūiymnyŋ 30 jyldyǧy aiasynda atqarylǧan ıs-şaralarǧa toqtaldy. Prezident Joldauynyŋ negızgı baǧyttaryn tılge tiek etken spiker ardagerler qauymdastyǧynyŋ aldynda tūrǧan mındetterge ekpın tüsırdı. «Qalanyŋ ardagerler qauymynyŋ aldynda tūrǧan abyroily mındettıŋ bırı – Joldaudyŋ baǧyttaryn, jaŋalyǧyn är zeinetkerge jetkızu. Bız qala ardagerlerı, «Jaŋa Qazaqstandy» qūruǧa qoǧamdy jaŋartuǧa baǧyt alǧan Prezidenttıŋ saiasatyn tolyq qoldaimyz!» dedı Sansyzbai Esılov.
Jyl saiyn qala biudjetınen zeinetkerlerge bırjolǧy tölemder tölenedı. Äleumettık jaǧynan älsız azamattardy qoldau – elorda äkımdıgınıŋ basymdyq berıp otyrǧan saiasaty. Biyldan bastap halyqtyŋ belgılı bır sanattaryna tölenetın tūrǧyn üi järdemaqysy 10 000 teŋgeden 18 000 teŋgege deiın östı. Būl kömek zeinetkerlerge, erekşe qajettılıgı bar balalardy, mügedekterdı tärbielep otyrǧan otbasylarǧa, tolyq emes otbasylarǧa körsetıledı. Baiandamaşy ötken jyldyŋ eleulı oqiǧasy retınde elorda äkımı Altai Kölgınovtıŋ qatysuymen Esıl audanyndaǧy Ardagerler ortalyǧynyŋ (Dostyq k-sı, 13 üi) aşyluyn atap öttı. Būl jerde zeinetkerlerdıŋ kündelıktı tūrmysyna qajettı barlyq jaǧdai jasalǧan: är adamnyŋ qyzyǧuşylyǧyna arnalǧan üiırmeler, sporttyq jabdyqtar, muzykalyq aspaptar bar, kompiuterde sauat aşu jäne aǧylşyn tılı kurstary jūmys ısteidı. Mūndai ortalyqtar qalanyŋ barlyq audandarynda bar.
Sansyzbai Esılov jalǧyzbasty jäne materialdyq-ruhani kömekke zäru ardagerlerge järdem jasau erekşe baqylaudaǧy mäsele ekenın qadap aitty. Sondai-aq ol ardagerler ūiymdarynyŋ qyzmetındegı kürmeuı şeşılmegen mäselelerdı aşyq aitty. Mäselen, qaladaǧy zeinetkerlerdıŋ bastauyş ūiymdarmen qamtyluy 54 paiyzdy qūraidy, demek 50 myŋnan astam adam nazar men qoldausyz qaldy degen söz. «Indettıŋ jäne özge de syn-qaterlerdıŋ äserınen bolǧan infliasiia jyldam ösude. Osyǧan orai, respublikalyq jäne jergılıktı atqaruşy organdarǧa tyl eŋbekkerlerıne, äleumettık äl-auqaty tömen azamattarǧa, jalǧyzbasty zeinetkerlerge kommunaldyq tölemder, därı-därmek, azyq-tülık boiynşa körsetıletın jeŋıldıkterdıŋ kölemın köteru turaly ūsynys engızemız. Zaŋdyq negızde tyl eŋbekkerlerınıŋ märtebesın Ūly Otan soǧysyna qatysuşylar men mügedekterdıŋ zeinetaqysy men jeŋıldıkterı kölemıne teŋestırudı sūraimyz» dedı baiandamaşy.
Plenumnyŋ jūmysy barysynda Prezident Joldauynyŋ negızgı baǧyttary talqylanyp, köptegen bastamalar men ūsynystar aityldy. Mäjılıs soŋynda arnaiy qauly qabyldanyp, aǧymdaǧy ūiymdastyruşylyq jūmystar naqtylandy.
