Astanadaǧy Ūlttyq akademiialyq kıtaphanada QR Memlekettık syilyǧynyŋ laureaty, körnektı teatr synşysy Äşırbek Syǧaidyŋ ömırı men şyǧarmaşylyǧy jaiynda jazylǧan «Syn sardary» atty estelık kıtaptyŋ tanystyrylymy öttı.
Biyl Äşırbek aǧa közı tırı bolsa jotaly jetpıs jasqa tolyp, tuǧan halqynyŋ ystyq yqylasyna bölenıp, marqaiyp aramyzda otyratyn edı. Amal ne, jazmyştan ozmyş joq degen. Alaida, aituly azamat ömırden ötse de onyŋ elı üşın jasaǧan eŋbegı men ısı eş ūmytylǧan joq. Qaita kün ötken saiyn jaŋǧyryp barady.
Keş tızgının qolǧa alǧan belgılı jazuşy Tölen Äbdık talantty tūlǧanyŋ adami bolmysy men qairatkerlık qyryna toqtaldy.
– Äşırbek – san qyrly jıgıt. Qazaqta: «Segız qyrly, bır syrly» degen söz bar ǧoi. Sol Äşekeŋe arnap aitylǧandai. Ol aldymen – teatr synşysy. Synşylyǧynyŋ özı erekşe. Ūlttyq teatr önerınıŋ ırgetasyn qalaǧan ardaqtylarymyz jaiynda täptıştep jazdy. Odan keiın Asanälı Äşımov, Änuar Moldabekov turaly tamyljytyp qalam terbedı. Oblystaǧy teatrlardyŋ jetekşı akterlary jaiynda ǧajap maqalalar tuǧyzdy. Onyŋ jazǧandaryn qazaq teatrynyŋ ensiklopediiasy dep aituǧa bolady. Äşekeŋnıŋ şyǧarmaşylyǧy men ıskerlık qabıletı de tört aiaǧyn teŋ basqan tūlpardai edı. Ūzaq jyldar joǧary därejelı qyzmet atqardy. Şeşendık qasietın de saǧynyp eske alamyn. Ol bır ülken jiyndarda söilep ketkende aldynan arqan qoiyp toqtata almaisyz – dep, parasatty söz qozǧady.
Qazaqstannyŋ Eŋbek erı Asanälı Äşımov aǧamyz da ını-dosy turaly aqtarylyp söiledı.
– Men ötken ǧasyrdy «ūlt ruhaniiatynyŋ altyn ǧasyry» dep oilaimyn. Jetpısınşı jyldary qazaq ädebietı men mädenietıne bır buyrqanǧan buyn keldı. Sol toptyŋ arasynda almastai jarqyldaǧan Äşırbek te boldy. Bügın Äşırbektıŋ atyndaǧy teatr festivalı ötıp jatyr. Äşırbek oǧan tolyq jauap beredı. Ony dästürge ainalsa deimız. Bız özı ülken närsege ūqypsyzbyz. Bır ötkızemız de ūmytyp ketemız. Ūmytpauǧa tyrysu qajet. Men ony öz salasyndaǧy «ūly» dep aita alamyn. Būl sözdı ömırden ötkennen keiın senımdı aituǧa bolady. Onyŋ maǧan bergen järdemı ūşan-teŋız. Teatr synşysynyŋ köregendılıgımen aitqanyn – sol jasaǧan röldı, obrazdy jeteŋızge jetkızıp oinaisyz. On jastai aiyrmaşylyǧymyz bolsa da ını dos boldyq. Menı «Aske» dep aituşy edı. Qazır sol sözdı saǧynamyn, – dedı äigılı akter.
Türkıstannan şaraǧa ädeiılep kelgen jaqyn aǧasy Jarylqasyn Äzıretbergenūly da: «Äşırbek ınımmen bala kezden aralasyp, ol ını, men aǧa bolyp jarasyp, syilasyp jürdık. Ai saiyn maǧan 4-5 ret telefon şalyp, ūzaq söilesuşı edık» dep bauyrynyŋ asyl qasietterın qimastyqpen eske aldy.
Odan keiın tanymal aktrisa Meruert Ötekeşeva, qoǧam qairatkerı Orazgül Asanǧazy, teatr synşysy Äliia Böpejanova, akademiialyq kıtaphananyŋ direktory Ümıthan Däurenbekqyzy söz alyp, ardaqty azamat turaly öz estelıkterımen bölıstı.
Oqyrmanǧa jol tartqan kıtaptyŋ tūsauyn Asanälı aǧamyz qidy. Jaŋa tuyndy da Ömırzaq Aitbaiūly, Seiıt Qasqabasov, Äkım Tarazi, Dulat İsabekov, Sauytbek Abdrahmanov sekıldı elge belgılı azamattardyŋ qazaq teatr synynyŋ maitalmany jaiynda jazǧan estelıkterı jinaqtalǧan.
Şara soŋynda Äşırbek aǧamyzdyŋ jary Küläş Syǧai söz alyp, jinalǧandarǧa alǧysyn bıldırdı.
Asyl azamat dünieden ozǧanda aqyn İsrail Saparbai: «…Är qazaq ışınde edı Äşırbektıŋ, Äşırbek ışınde edı är qazaqtyŋ» dep öleŋ arnaǧan edı. İä, aqynnan asyryp aitu mümkın emes.
Azamat ESENJOL
