Keşe Astana qalasy äkımdıgınıŋ «Şarapat» äleumettık qyzmet körsetu ortalyǧynda Qazaqstan halqy assambleiasy men qalalyq äkımdık janyndaǧy «Qoǧamdyq kelısım» kommunaldyq memlekettık mekemesınıŋ ūiymdastyruymen Nauryz merekesıne arnalǧan qaiyrymdylyq şarasy öttı.
«Şarapat» äleumettık qyzmet körsetu ortalyǧy zeinet jasyna jetken jandarǧa, I jäne II toptaǧy mügedekterge, ūdaiy basqa adamnyŋ kömegı men kütımıne mūqtaj jalǧyzbasty azamattarǧa qyzmet körsetu maqsatynda qūrylǧan. Mekeme 1989 jyldan bastap jūmys ıstep keledı. 2007 jyly Memleket basşysynyŋ bastamasymen atalmyş mekemenıŋ jaŋa ǧimaraty aşylǧan bolatyn. Mekeme qyzmetınıŋ basym baǧyty – ortalyqty mekendeitın qariialardyŋ sūranysy men qajettılıgın tolyq qamtamasyz etu. Mūnda tūraqty jäne uaqytşa tūruǧa arnalǧan 400 oryn qarastyrylǧan. Atalmyş ortalyqta 12 ūlttyŋ ökılı bır-bırımen tatu-tättı kün keşıp jatyr eken. Soǧan orai kärıs, qaraqalpaq, tatar-başqūrt siiaqty qaladaǧy bırqatar etnomädeni ortalyqtarynyŋ önerpazdary konserttık baǧdarlamalaryn ūsynyp, köpşılıktıŋ köŋılın köterdı. «Poliaki», «Obereg», «Vozrojdenie», «Zlata» syndy qoǧamdyq bırlestıkter de qaiyrymdylyq şaranyŋ ötuıne atsalysty. Äsem ännen erekşe äser alyp, şat-şadyman küi keşken qamköŋıl jandarǧa merekelık syilyqtar da tabys etıldı.
Şara barysynda söz alǧan Qazaqstan halqy assambleiasy hatşylyǧynyŋ meŋgeruşısı Läzzat Qūsaiynova Nauryz meiramynyŋ män-maǧynasy men qaiyrymdylyq şaranyŋ maqsaty turaly aityp öttı.
– Etnomädeni ortalyqtarynyŋ ökılderı «Şarapat» äleumettık qyzmet körsetu ortalyǧynda jyl saiyn dästürlı türde türlı şaralar ötkızıp tūrady. Osyndaǧy jandarǧa tättı taǧamdar ūsynyp, olarǧa syi-siiapat jasaidy, – deidı L.Qūsaiynova.
Nūrdäulet KÄKIŞEV
