Elordadaǧy Q.Quanyşbaev atyndaǧy Memlekettık akademiialyq qazaq muzykalyq drama teatryna jiı baramyn. Teatrda qoiylatyn jaŋa qoiylymdardan qalmaimyn desem bolady. Ǧajaiyp öner ordasynyŋ tūraqty körermenımın. Ondaǧy talai rölderdı somdap jürgen ärtısterdıŋ şeberlıgı maǧan jaqsy tanys.
Mäselen, özıme belgılı qalamger Rahymjan Otarbaevtyŋ tuma talanttyŋ azapqa toly ömırın örıp jazǧan «Ämıre» dramasy qatty ūnady. 1925 jyly Parijde ötken Bükıldüniejüzılık «EKSPO» körmesıne qatysqan Ämıre Qaşaubaevtyŋ taǧdyryna arnalǧan tuyndynyŋ sahnalyq şeşımderı körermendı beijai qaldyrmady. Qoiylymnyŋ rejisserı Nūrlan Jūmaniiazov tyŋ ızdenısterge barǧan. Bas keiıpkerdıŋ Parijge barǧanda halqymyzdyŋ taǧy bır aiauly ūly Mūstafa Şoqaimen kezdesuı de, körnektı qairatkerdıŋ jat jerde eldı saǧynyp jürgenı de şynaiy berılgen. Spektakldıŋ bas keiıpkerı «Ämıre» beinesın teatr ärtısterı Qasymhan Būǧybai men Asylbek Qapaev kelıstı somdady.
Al Qalleki teatrynyŋ körkemdık jetekşısı, Qazaqstannyŋ halyq ärtısı Talǧat Temenov qoiǧan «Qyzyl oramaldy şynarym» atty lirikalyq dramasy körermennıŋ köŋılınen şyqqan spektakl boldy. Qyrǧyzdyŋ äigılı jazuşysy Şyŋǧys Aitmatovtyŋ «Armanym, Äselım» povesı negızınde sahnalanǧan tuyndyda qos jastyŋ adal mahabbaty airyqşa bederlengen. Ūzatylyp bara jatqan jerınen tuǧan-tuystaryn tastap, süigenımen kete barǧan Äseldıŋ ömırı de adamǧa tereŋ oi salady. Bır-aq ret jıberılgen aǧattyq Iliiastyŋ otbasynan aiyryluyna äkep soǧady. Mıne, osy oqiǧalardyŋ bärı de ömırdıŋ özınen alynǧan.
Qysqasy, şahardaǧy bas teatrdyŋ är qoiylymyn qalt jıbermeimın. Alǧaş Aqmolada qazaq teatry aşylǧanda quanyşymyzda şek bolmady. Bügıngı «Astana» konsert zalynda körnektı suretker Ǧabit Müsırepovtıŋ «Aqan serı–Aqtoqty» tragediiasymen teatr şymyldyǧy türılıp edı. Sodan berı bıraz uaqyt öttı. Öner ordasynyŋ arnasy keŋeidı. «Astanalyq» degen märtebesı de bar. Ünemı teatr ūjymyna tılektes bolyp otyramyn. Bızdı olar jaqsy dünielerımen quanta bersın!
Saǧat BAQYRŞYQOVA,
zeinetker ūstaz
