Elımızde taǧdyrdyŋ tauqymetın tatyp, qiynşylyqtan qajyp jürgenderge qol ūşyn sozudy sauapty ıs sanaityn jandar köp. Şyq bermes Şyǧaibaidai «tapqanym tek özıme» dep emes, paidasynyŋ bır bölıgın qaiyrymdylyqqa jūmsap, jomarttyq tanytqandy jön köredı. Aqşasynyŋ köptıgınen emes, köŋılınıŋ keŋdıgınen bolsa kerek. Taǧy taŋnan keşke deiın jürıp, ıstegen ısı, adal eŋbegı üşın aqy sūramaityndar da bar. Olar erıktıler – erıkkender emes tek. Jaqsylyqty tu etken jobalar osyndai niettes adamdardy igı ıske jūmyldyrady. Sonyŋ bırı – «Şapaǧat» halyqtyq jobasy. Jaǧdaiy tömen jäne köpbalaly otbasylarǧa, jalǧyzbasty analarǧa, mümkındıgı şekteulı jandar men zeinetkerlerge kün saiyn azyq-tülık, kiım-keşek jaǧynan qoldau körsetıp, tıgın, manikiur, bet ärleu, şaştaraz, azpazdyq boiynşa şeberlık sabaqtaryn ūiymdastyrady. Bastysy – bärı tegın. İä, bız bügın qaiyrymdylyq jaiyn, «Şapaǧattyŋ» şarapatyn söz etemız.
QAIYRYMDYLYQTYŊ KÖBEIGENINE QUANBAIMYN
Qaiyrymdy ıstıŋ bastamasyna QKHP-nyŋ müşesı, Mäjılıs deputaty Aiqyn Qoŋyrov sep bolypty. «2016 jyly onyŋ tarapynan qoldauǧa zäru adamdarǧa kömek körsetu turaly ūsynys tüstı. Men ony ärı qarai örbıtıp, bırden ıske kırısıp kettım. Sebebı özım de köpbalaly otbasydan şyqqanmyn. Toqsanynşy jyldarda daǧdarys dendegen kezeŋde äke-şeşem jūmyssyz qaldy, azyq-tülık aluǧa aqşamyz bolmaityn. Sondyqtan da men qiyndyqqa, joqşylyqqa tap bolǧandardyŋ jaǧdaiyn jıtı tüsınemın. Jüregımmen sezınemın» deidı Nazgül Maqjan.
Äu basta astana boiynşa aiasy tar körıngen «Şapaǧat» bügınde 12 oblys boiynşa qyzmet körsetedı. Qaladan tys jerlerge, şalǧai aimaqtarǧa azyq-tülık jiyntyǧyn jetkızedı. Kei adamdar tūrǧyndar özderın jalyqtyrǧan köilekterı men aiaq kiımderın laqtyryp tastauǧa qūmar. Al jaǧdaiy tömen adamdar būl zattardy bır emes, bırneşe jyl kiedı. Qysqasy, kiılgen kiımnıŋ de özgege üşın ülken kömegı bar. Ötken jyly joba aiasynda 5500 bala mektep formasyna qol jetkızse, elordalyq otbasylarǧa 10 tonna azyq-tülık berılgen. Al biyl şılde aiynda partiiamen bırge 8600 otbasyǧa azyq-tülık berıldı. El kölemınde şamamen 100 tonna azyq-tülık taratylǧan.
Sondai qoldau körgen jandardyŋ bırı Gülşat Bekseitova öz oqiǧasymen bölıstı. «Menıŋ üş balam bar. Ülken ūlym 15 jasta, mügedek. Ūlym tūryp jüre almaidy, özdıgınen tynys almaidy. İVL apparatynyŋ kömegımen dem alady. Ūlym bır jyldai auruhanada em aldy. Sosyn üige şyǧardy. Alaida därı-därmegı bar, şynyn aitsam, qaltasy kötermeidı. Därıgerlerdıŋ özın üige şaqyrtyp, emdetu oŋaiǧa soqpady. Jan-jaqtan qoldau ızdedım, sonda «şapaǧattyqtar» kömegın aiamady. Nazgül hanym menıŋ jaiymdy Densaulyq saqtau ministrlıgıne deiın jetkızıptı. Sodan memleketten tegın därıler beretın boldy, därıgerler de üige kelıp, ūlyma em-domyn jürgızıp ketedı. Onymen qoimai, biyl ekı qyzyma mektep formasyn, kompiuter, kerek-jaraǧy salynǧan sömke syiǧa tartty. 3 balamen jesır qalǧanmyn. Päter jaldap tūramyn. Balamnyŋ densaulyǧyna bailanysty jūmys ıstei almaimyn. Öitkenı apparattaryn ai saiyn auystyryp otyru qajet, onyŋ özı elımızde tapşy, şetelden aldyrtamyz» dep şapaǧattyqtarǧa şeksız alǧys bıldırdı.
«Şapaǧattyŋ» elordadaǧy bölımşesınde qazır 11 adam jūmys ısteidı. Olardyŋ denı – erıktıler. «Bız tapsyrys qabyldaimyz, mūqtaj adamdardyŋ tızımın jasaimyz, kiım-keşek jinap äkelıp, olardy kır juatyn oryndarǧa, himiialyq tazalauǧa, ozonmen tazartuǧa jıberemız, odan soŋ qoimaǧa ornalastyramyz, azyq-tülıktı ölşep, buyp, tüiıp, daiyndap qoiamyz. Osy zattar qajet adamdar bızge kelıp, qalaǧanyn aqysyz alyp ketedı» dei kele, Nazgül Maqjan özınıŋ qaiyrymdylyqtyŋ köbeigenıne quanbaitynyn aitty. Sebebı ol – halyqtyŋ jai-küiınıŋ körınısı. Sondyqtan kömek sūramaityn jaǧdaiǧa jetsek eken deidı.
Onyŋ sözınşe, byltyr «Şapaǧat» halyqtyq jobasynyŋ elordadaǧy keŋsesıne künıne 10 adam habarlassa, biyl nauryz aiynan bastap künıne şamamen 80 adam habarlasyp, kömek sūraityn bolǧan. Künıne 100 adamǧa deiın qyzmet körsetıledı. Tiısınşe būryn auysyp jūmys ısteitın 2 üilestıruşı jetse, qazır olardyŋ qasyna kömekşı jūmyldyrypty.
QİYNDYQQA QARSY TŪRUǦA ÜIRETTI
«Şapaǧat» halyqtyq jobasy janynan bet ärleu, tyrnaq ädemıleu, tıgın tıgu sekıldı türlı tegın kurstar ūiymdastyrdy. «Jaqynda bet ärleudıŋ negızın meŋgeruge yqylas bıldırgenderdıŋ kezektı toby oquǧa kırıstı. Karantin kezeŋınde mūndai kurstarǧa qajettılık kürt köbeidı. Bız «Şeber ana» degen kurs aştyq. Onda ısmerler balalar kiımınen bastap qūraq körpege deiıngı dünielerdı tıgedı. Būǧan qosa «Qyz jasauyn» tıgudı üiretetın kursymyz bar. Qyzdar tıkken būiymdaryn äleumettık jelı arqyly ötkızıp, satqan alǧaşqy dünielerın suretke tüsırıp, bızge jıberıp jatady. Bız olardyŋ är jeŋısıne öz jeŋısımızdei quanamyz! Demeuşı, tapsyrys beruşı tauyp beruge tyrysamyz. Demeuşılep ısmerlerge tıgın maşinalaryn jäne basqa da qajettı kerek-jaraqtaryn satyp alyp beredı. Qazır bızdıŋ kurstan ötken bır qyzymyz basqa adamdarǧa qūraq körpe tıgudı üiretıp, käsıp bastap jatyr» dedı Nazgül Maǧjan.
Mäselen, «Şeber ana» boiynşa bılım alǧan Dana Nabievanyŋ bügınde öz käsıbı bar. «Būl jobany 2017 jyly eŋ alǧaş ret balalarymdy jaŋa jyldyq keşke şaqyrǧan kezınen bılemın. Künı bügınge deiın qoldauyn aiamaidy. Qyrküiekte balalaryma kompiuter berdı. Özım köpbalaly anamyn, balalardyŋ jūrttan kem bolmaǧanyn qalaimyn, alaida oǧan qarajat jetkılıksız bolady. Sol tūsta şapaǧattyŋ şarapaty tidı bızge. Arnaiy jazdyq lager ūiymdastyrady. Özım zaŋ jüzınde, materialdyq, psihologiialyq köp kömek aldym. Tört balanyŋ anasymyn, üide otyrdym. Sodan bır künı tıgın maşinasyn balanyŋ aqşasyna satyp aldym. Türlı kiımder tıge bastadym. Şapaǧatta «Şeber ana» kursy aşylypty, soǧan qatystym. Ülken täjıribe jinadym. Taǧy bet ärleu boiynşa sabaq aldym. Artynşa käsıbi tıgınşılık sabaǧyna 1 ai qatysyp, jūmysqa ornalastym. Al qazır özımnıŋ tıgın salonym bar. Qasyma kömekşı de aldym. Nazgül hanymnyŋ arqasy dep bılemın. Menıŋ boiymdaǧy talanttardy aşuǧa sep boldy. Öz käsıbımdı aşu men üşın tıptı oryndalmas arman edı, bügın qarasam, bärı öz qolyŋda eken. Sol jolda qaiyrymdy jandardyŋ «Şapaǧattyŋ» ülken qoldauy tūr» deidı Dana. Sondai-aq taǧy bır kelınşek: «Men ūlyma kiım satyp alǧan joqpyn bastapqyda. Özımnıŋ ädemı kök halatymnan kürteşesın, jempır qiyndylarynan şūlyq, jaŋa jempır toqyp berdım. Ökşesı jyrtylǧan polzunkidıŋ balaǧyn qiyp tastap, qaitara tıgıp, tüime qadadym. Sändı şalbar tıgıp berdım öz qolymnan. Sol uaqytta eşkım bızdı syrttan qinalyp jür dep oilaǧan emes. Qaita mūny qaidan aldyŋ dep qyzyǧatyndar köptep kezdestı. Sondyqtan alǧan bılımım kädege jarady. Qiyndyqqa qarsy tūruǧa üirettı» dep jazba qaldyrypty joba saitynda.
«Botaqan» – būl da kezektı jaqsylyq jasauǧa arnalǧan joba. «Bızge joldasy nemese jıgıtı tastap ketkendıkten jäne qarjylyq qiyndyq saldarynan balalaryn perzenthanada tastaǧaly jürgen jüktı äielder kele bastady. Bolaşaq analardyŋ bosanar aldyndaǧy kerektı zattar tızımın jinai almai, ümıtı tausylǧan. Bız olarǧa qoldau körsettık. «Şeber ana» kursyna qatysuşylar säbidıŋ jaialyǧyn, jeidelerın, analarǧa arnap halat tıktı. Bır käsıpker jörgekpen qamtamasyz ettı» deidı Nazgül.
«Şapaǧat» halyqtyq jobasy aiasynda ömırdıŋ qiyndyǧyna tap bolǧan adamdarǧa tek qana materialdyq emes, psihologiialyq, zaŋgerlık kömek körsetıledı.
Ortalyqpen bailanysu üşın 8-771-020-93-37 nömırıne habarlasu qajet nemese instagram jelısındegı @shapagatproekt paraqşasynda hat-habar qaldyrsa bolady.
Naima NŪRALYQYZY
