Astana saiabaqtarynda, Esıldıŋ jaǧalaularynda ekı bırdei jıŋışke taiaqpen qazdaŋ basyp, baiau adymdaǧan jürgınşıler köptep kezdese bastady. Būlardy «Skandinav jürısın» salauatty ömır saltyna ainaldyra bastaǧandardyŋ alǧaşqy legı deuge bolady.
Jaŋa ürdıske sport türı retınde qaraityn bolsaq, ötken ǧasyrdyŋ 40-jyldarynan bastap ene bastaǧan. Qos taiaqpen jaiau jürıp jattyǧudyŋ türın Finliandiia jattyqtyruşylary oilap tapqan. Maqsaty – mausym aralyǧynda şaŋǧyşylardyŋ babynda boluy üşın asqan qajettılık edı. «Skandinav jürısın» ūzaq jyldar boiyna tek sportşylar arasynda qoldanylsa, 90-jyldardan bastap bükıl älemnıŋ qarttary qolyna taiaq ūstap jolǧa şyqqan sekıldı.
Uaqyt öte kele būl qos taiaqtyŋ egde adamdar üşın taptyrmaityn dene şynyqtyrudyŋ bırden-bır tiımdı täsılı ekenı moiyndaldy. Osy seruennıŋ arqasynda adam denesı būlşyq etterınıŋ 90 paiyzy şynyǧady. Artyq salmaqtan arylyp, jürek pen ökpenıŋ jūmysy jaqsarady. Jürek-tamyr jüiesı sergıp, tırek-qozǧalys apparatynyŋ kemtıkterı qalpyna keledı. Arterialdy qan qysymy qalpynda bolyp, jüike jūmysy jaqsarady.
Astana qalasy Salamatty ömır salty ortalyǧynda «Skandinavtyqtardyŋ salauatty jürısımen ainalysuşylardyŋ kluby jūmys ısteidı. Oǧan är jastaǧy kez kelgen adam kelıp, nūsqauşynyŋ kömegımen alǧaşqy qadamyn jasai alady. Bırer sabaqtan keiın özdıgınen taiaqqa süienıp jürudı tez meŋgerıp alyp ketedı eken.
– Medisina salasynda zertteulerdıŋ nätijesınde oŋaltu jaǧdaiynda taptyrmaityn täsıl ekenıne közımız jetıp otyr. Äsırese, omyrtqalaryna zaqym kelgender, infarkt alǧandar, tynys alu joldarynyŋ auruynan keiın osy arqyly tez qalpyna keldı. Sonymen bırge, osteohondroz, artroz, osteoporoz, ortopediialyq auytqulary men buyn aurularyna, nevroz ben ūiqysyzdyqta būl daǧdy jaqsy nätije beredı.
Bızdıŋ klubqa tek nauqastar emes, denı sau astanalyqtar da tırkelıp jatady,– deidı jattyqtyruşy Äsiia Amangeldıqyzy.
