Elordanyŋ 20 jyldyǧy merekesınıŋ aiasynda Saryarqa audanynda bırneşe saiabaqtar saltanatty türde aşyldy. Solardyŋ bırı – Respublika daŋǧyly men Yqylas Dükenūly köşesınıŋ qiylysynda, ekınşısı Bırjan sal köşesındegı №5 üidıŋ janynda ornalasqan. Elorda äkımdıgınıŋ resmi saity habarlaǧandai, Baiqoŋyr audanynda da bır saiabaqtyŋ qūrylysy aiaqtalyp, paidalanuǧa berıldı.
Atap aitarlyǧy, ärbır saiabaqtyŋ aumaǧy abattandyrylǧan, balalar oinaityn jäne sporttyq alaŋdar bar. Barlyq saiabaqtar būzylǧan jäne apatty üilerdıŋ ornyna salynǧan. Säulettık qūrylymyna säikes, är saiabaqtyŋ qaitalanbas stilı bar. Mysaly, olarǧa «Qiial saiabaǧy», «Şabadan saiabaǧy» degen ataular berılgen. Alǧaşqysynda skeitdrom, Eims bölmesı, balalar syrǧanaǧy, oiyn alaŋy közdıŋ jauyn alady. «Şabadan saiabaǧy» temırjol vokzalyna jaqyn ornalasqan, sol sebepten şaǧyn säulettık formalar şabadan ülgısınde jasalǧan. Sol jerde balalar temırjoly da bar.
Sondai-aq, Puşkin köşesınde balalar alaŋqaiy, sporttyq jabdyqtary ornatylǧan saiabaq aşyldy. Jergılıktı tūrǧyndar asyq atudan jarys ötkızemız dep mäz boluda. Būdan bölek, Astana künınde taǧy 5 saiabaq aşyldy. Olar Äliia Moldaǧūlova köşesındegı №19, 21 üilerdıŋ audanynda paida boldy. «Auyl şaruaşylyǧy saiabaǧy» dep atalǧan nysandaǧy balalar oiyn alaŋy, şaǧyn säulettık formalar januarlar men ösımdıkter keipınde beinelengen. Basqa saiabaqtar Jeŋıs daŋǧylyndaǧy №36/1, Iliias Esenberlin köşesındegı №36 üidıŋ, Jeltoqsan köşesındegı №2 üidıŋ janynan boi köterdı. Barlyq saiabaqtarǧa kanalizasiialyq, injenerlık jäne su qūbyry jelılerı tartylǧan. Keibır saiabaqtarda futbol, basketbol alaŋdary qosa salynǧan.
