Elordadaǧy Täuelsızdık saraiynda otandyq jäne şeteldık suretşıler tobynyŋ «Art Balaban» körmesı ūiymdastyryldy.
– Taqyrybynyŋ erek estıletının bılemız. Balaban degenımız – öte sirek kezdesetın, jyldam ūşatyn, sūŋqar tärızdes qūs. Bız de öner älemıne sony serpın, jaŋa lep äkelgımız keledı. Oilasa kele Qazaqstandaǧy jäne körşıles memleketterdegı qylqalam şeberlerınıŋ basyn qosyp, osyndai top qūrudy şeştık, – dedı Astana qalasynyŋ Jas suretşıler bırlestıgı töraǧasy Ömırälı İsmailov. Özı körmege bırneşe jūmystaryn ūsynypty. Arasyndaǧy «Ūly dala elı» jäne «Baiqoŋyr» atty triptihterın bır demmen jazylǧan dünie ekenın aitty.
Körmege negızınen abstraksiia, realizm janryndaǧy kartinalar qoiylypty. Qonaqtar, äsırese, tabiǧat körınısın beineleitın suretterge qatty qyzyǧuşylyq tanytty.
– Qyrǧyzstandyq suretşı Ruslanbek Jünısälievtıŋ kartinalarynan auyldyŋ, dalanyŋ, qyr qyzǧaldaqtarynyŋ iısı aŋqidy. Osydan-aq suretşınıŋ şeberlıgın aŋǧaruǧa bolady emes pe?! – dep aǧynan aqtaryldy Qazaq ūlttyq agrarlyq universitetınıŋ oqytuşysy Baian Aqaidarova.
El egemendıgınıŋ 25 jyldyǧy men «EKSPO – 2017» körmesıne orailastyrylǧan būl şara aldaǧy uaqytta respublikanyŋ özge de öŋırlerınde ötedı.
Botagöz MARATQYZY
