Täuelsızdık ūrpaqtarynyŋ arasynda bılım-bılıgı, talant-talabymen tek jerlesterın ǧana emes, şeteldıkterdı de taŋqaldyryp, moiyndatyp jürgen jastar köp. Olar qoǧamnyŋ türlı salasynda ülken jetıstıkterge jetıp, tuǧan elınıŋ daŋqyn şyǧaruda. Sondai bılımdı jastardyŋ bırı, bolaşaq därıger Temırhan Baiahmetov soŋǧy üş jyl qatarynan «TMD-nyŋ üzdık studentı» jüldesıne ie boldy. Onyŋ ǧylym salasyndaǧy jetıstıkterı halyqaralyq deŋgeidegı konferensiialar men medisinalyq chempionattarda alǧan diplomdarynan, tiımdı ǧylymi jobalarynan jinaqtalǧan.
Pavlodarlyq Temırhan qazırgı taŋda Semei medisina universitetınde 5- kursta oqidy. Bügın 14 qazanda 22 jasqa tolǧan Temırhannyŋ medisinaǧa degen qyzyǧuşylyǧy balalyq armanymen ūştasyp jatyr. Sonyŋ arqasynda ol 2018 jyly oquǧa tüspes būryn «Käsıbı boiynşa üzdık» qalalyq baiqauynda «Kışı meiırger-massajist» atalymy boiynşa jeŋımpaz atandy. Kelesı jyly joǧary oqu ornyna «Jalpy medisina» mamandyǧy boiynşa oquǧa tüsıp, özın ünemı bılımın jetıldıruden tanbaityn, ızdenımpaz şäkırt retınde ǧana körsettı. Universitet ömırındegı qoǧamdyq jūmystarǧa belsene aralasatyn keiıpkerımız SCOPH komitetı basşylyǧymen ötken «Ömır soǧysy» ıs-şarasyna, «Ruhani jaŋǧyru» respublikalyq ziiatkerlık baiqauyna qatysqan. Üzdıksız ūmtylysynyŋ jäne käsıbi bılıktılıgın keŋeituge degen talpynysynyŋ arqasynda 2020 jyly Johns Hopkins University oqu ornynyŋ psihologiia boiynşa onlain-kursyna qatysyp, «Coursera» halyqaralyq bılım platformasyndaǧy Novosibirsk State University tektı basqaru jönındegı qysqa kursty oqyp tämamdady. Oqu ornyndaǧy Jalpy bılım beru tärtıbı kafedrasyndaǧy «Medisinadaǧy IT» ǧylym studenttık üiırmesınıŋ müşesı.
Ǧylymǧa äuestıgın pandemiia bastalǧan jyly 2-kursta oqyp jürgende universitette ötken «Student jäne ǧylym. Qoǧamdyq densaulyq saqtau, äleumettık-gumanitarlyq ǧylym jäne sifrlyq medisina» atty jyl saiynǧy konferensiiada tanytyp, «Medisina nysandarynyŋ kompiuterlık 3-D-vizualizasiiasy» taqyrybynda jasaǧan baiandamasy üşın bırınşı oryn aldy. 2021 jyly halyqaralyq «Studenttık ǧylym jäne densaulyq» ǧylymi-täjıribelık konferensiiasyna qatysyp, II därejelı diplomǧa ie boldy. Sol jyly Halyqaralyq Studenttık ǧylymi qoǧam jūmystary şeŋberınde «Medical Soft Skills» IV Bükılreseilık chempionatyna qatysyp, 3-oryn alady. Ǧylym künıne arnalǧan №64 ǧylymi-täjıribelık konferensiiada «Excel vizualizasiiasy kömegımen auru tarihy körsetkışterın taldau» taqyrybynda baiandama jasaǧany üşın III därejelı diplommen marapattaldy. 2022 jyly Ekaterinburgtegı Oral memlekettık medisinalyq universitetı bazasynda ötken «Zamanaui medisina ǧylymy men densaulyq saqtau salasynyŋ özektı mäselelerı» konferensiiasyna qatysyp, I därejelı diplom iesı atanady. Byltyr sondai-aq «Adam jäne Därı-Qazaqstan» XV halyqaralyq kongresınen de qalmady. Ötken jyldaǧy ülken jetıstıgı – Pavlodar oblystyq «Täuelsızdık ūrpaqtary» jüldesınıŋ «Bılım jäne ǧylym» atalymy boiynşa laureaty atanuy.
– Būl jüldenı jürektıŋ 3D modelı jobasyn jasaǧanym üşın aldym. Jürektıŋ 3DMAX ülgısın şetelde ötken konferensiiada tanystyrdym. Bolaşaqta kardiohirurg bolamyn dep, üşınşı kursta osy baǧytty taŋdadym. Bılıktı medisina mamanyna ainala otyryp, tuǧan elımnıŋ medisinasyn damytuǧa, halyqtyŋ densaulyǧyn jaqsartuǧa öz ülesımdı qosqym keledı, – deidı Temırhan.
Biyl köktemde №65 «Ǧylym jäne densaulyq» ǧylymi-täjıribelık konferensiiasynda 2-oryn jüldesın ielengen ol mamyr aiynda Özbekstannyŋ Būhara medisina universitetı ötkızgen halyqaralyq konferensiiada 1-oryn alady. Studentter almasu baǧdarlamasy boiynşa biyl aqpan-mausym ailarynda Reseidegı Riazanov memlekettık universitetınde oqudan ötedı.
Ǧylym men bılımnen bölek bala kezden önerge, sportqa, tarihqa da jaqyn bolǧan Temırhan mektepte geografiia, tarih jäne ädebietten qalalyq, oblystyq jäne respublikalyq olimpiadalarda jüldelı oryndardy alǧan. 10 jasynan bastap sambo men qazaq küresınen üiırmege qatysyp, turnirlerden jüldelı oralypty. Jan-jaqty jıgıt spidkubingpen de ainalysady, öleŋ şyǧaratyn da önerı bar. Onyŋ tabys qorjynynda respublikalyq «Önege» baiqauynyŋ «Mänerlep oqu» atalymynan alǧan I därejelı diplom jatyr. Osyndai jan-jaqtylyǧy jäne eŋ bastysy ǧylymdaǧy ızdenısterı men jetıstıkterı üşın bılımdı jas 2021, 2022 jäne 2023 jyldary üş jyl qatarynan «TMD Üzdık studentı» halyqaralyq baiqauynyŋ jüldesın alyp, qazaq jastarynyŋ qarymdy qabıletın älemge paş etıp keledı.
