Bügın Nūr-Sūltan qalasynda «Berekelı baspana» tūrǧyn üi baǧdarlamasy boiynşa kezekte tūrǧan köpbalaly otbasylar men äleumettık osal top ökılderıne 248 päterdıŋ kıltı tabys etıldı. Bız de sol quanyşty sätke kuä boldyq. Qazaqta qonystoidyŋ jönı bölek qoi. Öitkenı qazaq üşın baspana «öz üiım, öleŋ tösegım» ǧana emes, qūthanasy, äulet aibary, qasiettı qara şaŋyraǧy, tūrmysynyŋ qainar közı, baq-berekesı, ömırınıŋ temırqazyǧy desek artyq aitqandyq emes. Eŋ bastysy, baspana – qzaaq üşın kielı ordasy.
Söz oraiy kelgende aita ketken jön, Nūr-Sūltan qalasynyŋ äkımdıgı qoldan kelgenşe baspana kezegınıŋ tezırek jyljuyna yqpal etetın bar mümkındıkterdı qarastyryp keledı. Bügınde elorda boiynşa tūrǧyn üige mūqtaj jandar qatary 47099 adamdy qūraidy. Biyl mamyr aiynda «Tūrǧyn üi qatynastary turaly» zaŋǧa özgerıster engızılıp, halyqtyŋ äleumettık osal toby sanatyndaǧy köpbalaly otbasylar jeke topqa bölıngenı quanarlyq jaǧdai boldy. Būl degenımız – köpbalaly otbasylardyŋ baspana zarynyŋ az uaqyt aralyǧynda şeşuıne oŋ yqpalyn tigızbek. Bügıngı jaǧdai sonyŋ alǧaşqy nätijesı dese bolady.
Sondai-aq üstımızdegı jyly kommunaldyq tūrǧyn üi qorynan 1634 päter beru josparlanǧan. Onyŋ 731-ı – jalǧa, 233-ı – köpbalaly otbasyǧa, 105-ı – jetım balalarǧa, 277-sı – halyqtyŋ äleumettık osal tobyna, 115-ı memlekettık qyzmetşılerge jäne biudjettık ūiymdardyŋ qyzmetkerlerıne ūsynylmaq. Onyŋ syrtynda 2020 jyly taǧy da 1640 päter ülestırıledı degen boljam bar.
Baspana kıltın tabystau räsımın Nūr-Sūltan qalasy äkımınıŋ orynbasary Baqtiiar Mäken aşyp: «Qūrmettı elorda tūrǧyndary, ardaqty aǧaiyn, barşaŋyzdy qonystoimen şyn jürekten qūttyqtauǧa rūqsat etıŋızder» dep söz bastady. «Elbasymyzdyŋ äleumettık saiasatynyŋ sabaqtastyǧy retınde Prezidentımız Q.Toqaevtyŋ tapsyrmasyna säikes sızderge arnap tūrǧyzylǧan päterlerdı tabystap jatyrmyz. Būl – bızdıŋ äleumettık saiasattaǧy basym baǧyttardyŋ bırı. Alda älı de alar asu, ümıt artqan ülken maqsattar bar. Jaqynda ǧana «Nūrly Ertıs» baǧdarlamasymen Ekıbastūz qalasyna jüzden astam otbasyn jıberdık. Qalamyzda mügedekter, jalǧyzbasty, köpbalaly analar, ŪOS ardagerlerı, jetım balalar siiaqty är sanattaǧy 47 myŋnan astam azamattar üi kezegınde tūr. Olardyŋ barlyǧyna da kezegımen baspana berıledı. Osy kündı köp jyl küttıŋızder. Abyrjyǧan, qobaljyǧan, uaiymdaǧan sätterdıŋ bärı artta qaldy. Quanyştaryŋyz ūzaǧynan bolǧai. «Otan otbasynan bastalady» degen. Otbasylaryŋyz aman bolsyn» dep aqjarma tılegın bıldırdı.
Astanalyqtar qonystanǧan üi «saqaldy qūrylystyŋ» bırı eken. Irgetasy osydan on bır jyl būryn qalanǧan 312 päterlık nysannyŋ qūrylysy toqtap qalypty. Osyndai iesız qalǧan tūrǧyn üidı «Bazis-Dorstroi» JŞS moinyna alyp, jauapty da maŋyzdy şaruany aiaǧyna deiın jetkızıp, el yqylasyna bölendı. Käsıporyn basşysy Erlan Toqsanbaevtyŋ aituynşa, qala boiynşa osyndai qarausyz qalǧan ekı üi, ekı mektep, bır balabaqşany jönge keltırıp, el igılıgıne jaratuǧa mūryndyq bolypty.
«Tuǧan üidıŋ tütını jyly» dep beker aitylmaǧan ǧoi. Zaryǧa kütıp, äreŋ degende qol jetkızgen päterlerınıŋ kıltın alǧandardyŋ quanyştan közge jas ırkılgenın baiqadyq. Sonyŋ bırı J.Beisenbekova: «Men 12 jyl boiy özımnıŋ şaŋyraǧym bolsa eken dep armandadym. Osy uaqytqa deiın qanşama sergeldeŋge tüstım. Otbasymmen kım körıngennıŋ bosaǧasynda jürdım. Endı, mıne, bügın quanyşymda şek joq. Qala basşylaryna aitar alǧysym şeksız» dep aǧynan jaryldy.
İä, «Üi bolmai, küi bolmaidy» degen būrynǧylar. Baspana zärulıgı kımdı bolsa da beijai qaldyrmaidy. Degenmen elımızdegı baspanaǧa degen mūqtajdyqty tömendetu mäselesıne köp köŋıl audaryla bastady. Ol da bolsa köŋılge demeu.
