Üzdık oquşy
![](https://astana-akshamy.kz/wp-content/uploads/2022/05/dsc_7166.jpg)
Aişa Ömırälı – №59 mektep-liseidıŋ 8-synyp oquşysy. 4 jasynan bastap körkem gimnastikamen ainalysady. Odan bölek, qylqalam şeberı.
Kışkentai kezınde körkem gimnastikaǧa alǧaş ret qatysqan Aişaǧa būl ūnamaǧan. Keiın bır jyldan soŋ qyzyǧuşylyǧy oianypty.
– Bastapqyda adam köp bolǧan soŋ qatysqym kelmedı. Bıraq anama oilanyp, özım qaita qatysqym keletının aittym. Men düniege kelmei tūryp, Olimpiada oiyndary bolǧan eken. Sol kezde anam «qyzymdy osy körkem gimnastikaǧa qatystyramyn» dep armandapty. Körkem gimnastikaǧa 12 jasyma deiın qatystym. Onda tärtıp öte qatal. Naqty uaqytpen jüremız. Bıraq jaŋa dostar taptym, uaqytym köŋıldı ötetın. 8 jylda trenerım 6 ret auysty. Sebebı är deŋgeige ösken saiyn trener auystyryp otyru maŋyzdy. Şetelge baiqaularǧa jiı baratynbyz. Barlyq şyǧyndy ata-anam töledı.
Aişa ekı jyl būryn auyryp, ūzaq uaqyt qatysa almai qalǧan. Keiın būl qyzyǧuşylyǧyn bige almastyrǧan.
– Ūzaq uaqyt auyryp qaldym da, bıraz üzılıs boldy. Qaita bastaǧym kelgenmen, maǧan qyzyq bolmady. Qazır 1,5 jyldan berı bige qatysyp jürmın. Körkem gimnastikaǧa qatysqan soŋ menı bırden käsıbi topqa aldy. Alǧaşqyda hip-hopqa barǧan edım. Keiın zamanaui bi türıne auystym. Jaqynda Mäskeuge baiqauǧa baramyz. Soǧan daiyndaludamyz.
Bos uaqytynda rok janryndaǧy muzyka tyŋdaǧandy ūnatady. Odan bölek, suret salumen ainalysady.
– Suret salǧandy jaqsy köremın. Üiırmege barmai, üiden özım üirenıp aldym. Suret salǧannan alǧan äser basqaşa. Keide uaqytym bolsa, kino köremın. Äsırese, fantastikalyq janrdaǧy kinolardy ūnatamyn. Soŋǧy ret «Krasnye braslety» degen serial kördım. Onda qaterlı ısıkke şaldyqqan balalar turaly körsetılgen. Serialdaǧy balalar ärtürlı bolsa da, olardyŋ dostyǧy erekşe. Bärın ömırge degen qūştarlyq bırıktıredı. Auyr bolsa da, maǧynasy ūnady.
Aişa üşın ömırdegı basty qūndylyq – otbasy. Anasy jeke kompaniiada zaŋger bolyp qyzmet etedı.
– Otbasy bızdı kez kelgen qiyndyqta qorǧap, barlyq şeşımımızdı qoldaidy. Taŋdauymyzǧa qarsy kelmeidı. Bolaşaqta qai mamandyqty taŋdaitynymdy älı şeşpedım. Bıraq şyǧarmaşylyq baǧytty taŋdaityn şyǧarmyn.
– Eger basşylyqqa kelsem, elımızdegı zaŋ jüiesın özgerter edım. Bızde adamdy öltırgen qylmyskerge jeŋıl jaza berıledı. Būl dūrys emes. Ömır baqi bas bostandyǧynan aiyru kerek. Sol kezde adamdar būl qylmysty qaitalamaityn edı dep oilaimyn.
Synyp jetekşısı Aqbota Jandarqyzynyŋ aituynşa, Aişa – synypta öte ūiaŋ qyz.
– Bergen tapsyrmany jauapkerşılıkpen oryndaidy. Sabaqqa yntasy erekşe. Aişa öte salmaqty, biiazy bolǧanmen, bolmysy şyǧarmaşylyqqa jaqyn. Surettı öte keremet salady. Aldyŋǧy oqu jylynda densaulyǧyna bailanysty sabaqqa kelmegen bolatyn. Sol kezde ony suretşılık qyrynan tanydyq. Maǧan 8 nauryzǧa syilyq retınde özı salǧan surettı syilady. Öte ädemı edı. Qazır Aişanyŋ qolynan şyqqan tuyndylardy jinap, arnaiy körme jasaǧaly jatyrmyz.
Anasy Gülnazdyŋ aituynşa, Aişanyŋ mınezı qūbylmaly. Bırden aşyla qoimaidy.
– Qyzym köbınese köŋıldı jüredı. Kez kelgen jaǧdaiǧa tez beiımdeledı. Meiırımdı, elgezek. Ärqaşan uaqytyn özın-özı tabuǧa arnaidy. Jaŋa närselermen ainalysqandy ūnatady. Özındık pıkırı bar. Oǧan özı qalamaǧan närsenı jasata almaimyz. Bos uaqytynda üide mysyǧyna qaraidy, üi tırlıgımen ainalysady. Köp kıtap oqidy. Soŋǧy jarty jylda kıtap qory köbeidı. Är ai saiyn 6-7 kıtap alamyz. Suret salǧandy qatty ūnatady. Menımen bolǧan oqiǧalardy, keibır mäselelerdı aşyp talqylaidy. Pıkırımız kelıspei qalatyn tūstar da bolady. Ondai kezde «qandai pıkırde bolsaŋ da, öz közqarasyŋnan taima, būl – menıŋ jeke pıkırım» dep aityp tüsındıruge tyrysamyn. Sebebı ekeuara senım maŋyzdy. Men üşın qyzymnyŋ denı sau, süigen käsıbımen ainalysyp, baqytty boluy maŋyzdy. Ata-ananyŋ baqyty da osy dep bılemın.
Aizada Jaiyqqyzy