Endı astanalyqtar men qala qonaqtary zeinetaqyǧa qatysty kez kelgen sūraq jönınde «109» nömırıne habarlasa alady. Būl turaly Bıryŋǧai jinaqtauşy zeinetaqy qory men iKomek qalalyq monitoring jäne jedel äreket etu ortalyǧy arasynda kelısım jasaldy.
Sonymen qatar Bıryŋǧai jinaqtauşy zeinetaqy qorynyŋ call-ortalyǧy da būrynǧysynşa jūmysyn jalǧastyra beredı. Tek 1418 nömırıne Qazaqstannyŋ barlyq öŋırınen habarlasatyndyqtan, iKomek ortalyǧynyŋ «109» nömırı astanalyqtar üşın qosymşa bailanys qūraly retınde qoldanylatynyn mälımdedı özara kelısımge qol qoiǧan «BJZQ» AQ Astana qalasy filialynyŋ basqaruşy direktory Mūrat Şärıpov pen iKomek qalalyq monitoring jäne jedel äreket etu ortalyǧynyŋ direktory Jannat Dübırova. Spikerlerdıŋ aituynşa, aldaǧy uaqytta «109» nömırıne qoŋyrau şalǧandardy BJZQ-nyŋ call-ortalyǧyna tıkelei jalǧau mümkındıgı de qarastyrylady.
– iKomek ortalyǧynyŋ 60 operatory elordalyqtarǧa 770-ten asa qyzmet türı boiynşa kündız-tünı qyzmet körsetedı. Kez kelgen mekememen kelısım jasasqanda aldymen operatorlarǧa sol sala keŋınen oqytylady. Sondyqtan olar tūrǧyndardy tolǧandyrǧan kez kelgen saualǧa jauap bere alady. Al zeinetaqy är adam üşın maŋyzdy bolǧandyqtan, Astana jūrtyna būl kelısımnıŋ paidasy mol bolady dep oilaimyn, – dedı Jannat Dübırova.
Öz kezegınde Whatsapp jelısı men sait arqyly da sūraq qoiuǧa bolatynyn tılge tiek etken Mūrat Şärıpov «Bıryŋǧai jinaqtauşy zeinetaqy qory» AQ men Astana qalasy äkımdıgınıŋ arasyndaǧy memorandum aiasynda jergılıktı bilıkpen bırlesıp türlı şaralardyŋ ötkızılıp jatqanyn aitty.
