Jaqynda ardager ūstaz, biologiia ǧylymdarynyŋ kandidaty Roza Mausymbaeva mereilı 70 jasqa toldy. Roza Mahmetqyzy zeinet jasynda bolsa da, salauatty ömır saltyn ūstanyp, Belsendı ūzaq ömır süru ortalyǧynda bölım basşysynyŋ qyzmetın atqarady.
Zeinetkerlıkke şyqqan soŋ äleumettık saladaǧy qyzmetın volonterlıkten bastaǧan. Astana qalasynyŋ Saryarqa audandyq Ardagerler keŋesı janyndaǧy bos uaqytty ūiymdastyru ortalyǧynda qala zeinetkerlerıne sauyqtyru gimnastikasynan sabaq berdı. 2021 jyly Belsendı ūzaq ömır süru ortalyǧynyŋ direktory Mūhtar Erketaevtyŋ şaqyrtuymen ortalyqtyŋ
Saryarqa audanyndaǧy bölımıne psiholog bolyp jūmysqa ornalasty. Sodan berı Belsendı ūzaq ömır süru ortalyǧynyŋ ūjymynda tapjylmai eŋbek etıp, ūjymdaǧy jastarǧa ülgı-önege körsetude.
Bügınde Roza Mausymbaeva jetekşılık etetın bölım Astana qalasyndaǧy 5 audan boiynşa qyzmet aluşylarǧa sapaly äleumettık qyzmet körsetudı üilestırude.
«Belsendı ūzaq ömır süru ortalyqtarynyŋ basty maqsattarynyŋ bırı – zeinet jastaǧy adamdardy äleumettendıru üşın qoljetımdı jaǧdailar jasau. Bügınde egde jastaǧy adamdardyŋ belsendı ömır saltyn ūzartu motivasiiasyn qalyptastyru üşın 6 türlı äleumettık kömek körsetemız. Būl – äleumettık sauyqtandyru, äleumettık-medisinalyq, äleumettık-ekonomikalyq, äleumettık eŋbek, äleumettık bos uaqyt jäne t.b. qyzmetter. Ortalyqtaǧy därıger, psiholog mamandarymyz qyzmet aluşylardy alǧaşqy medisinalyq tekseruden ötkızıp, psihologiialyq baqylauda ūstaidy. Būl zeinetkerlerımızdıŋ fizikalyq jäne emosionaldyq jaǧdaiyn saqtauǧa mümkındık beredı» deidı Roza Mahmetqyzy.
Roza Mausymbaeva – äleumettık salanyŋ bılıktı mamany ǧana emes, pedagogikalyq jäne ǧylym jolynda 30 jyl qyzmet etken bılıktı ūstaz, ǧalym. Medisina salasynda oqytuşylyq qyzmet atqardy. Mamandyǧy boiynşa – psihofiziolog. 50-den astam ǧylymi jariialanymdardyŋ avtory. Özınıŋ medisina salasynda jinaqtaǧan bılımı men täjıribesın äleumettık salada ūtymdy paidalanuda.
«Psihofiziolog maman retınde jinaqtaǧan täjıribemdı bügınde egde jastaǧy adamdardyŋ fizikalyq densaulyǧyn nyǧaituǧa jūmsap jürmın. Menıŋ jūmys täjıribem jattyǧular men ädısterdı taŋdaudyŋ ädıstemelık negızderın äzırleude, sondai-aq qyzmet aluşylarǧa emosionaldyq tūrǧydan kömek körsetuge mümkındık berdı. Özım zeinetker bolǧasyn, zeinet jastaǧy adamdardyŋ jaǧdaiyn jaqsy tüsınemın» dep sözın tüiındedı Roza Mausymbaeva.
Meruert QAIYRTASQYZY
