Qamqorlyqqa zäru zeinetkerlerdıŋ jazǧy demalysyn ūiymdastyrudy dästürge ainaldyrǧan qalalyq ardagerler keŋesı biyl taǧy 150 qariiany qamqorlyqqa aldy. Endı olar elorda maŋyndaǧy «Nūra» demalys ornynda demalady.
Astana qalalyq ardagerler keŋesınıŋ töraǧasy Amankeldı Syzdyqovtyŋ aituynşa, qarttar būl jerge taŋerteŋ ertemen arnaiy kölıkpen keledı eken. Taŋǧy astaryn ışkennen keiın olar bır-bırımen äŋgımelesıp, sol jerde gazet-jurnal oqyp, şahmat nemese doiby oinap, teledidar köredı. Mūnda bıreuler ıs tıkse, ekınşılerı öleŋ aityp, garmon tartyp, qysqasy, bos uaqyttarynda ärkım özıne ūnaityn ıspen ainalysady. Sondai-aq, tüskı astaryn ışıp, şaştarazǧa barularyna, tıptı, qariialardyŋ qan qysymyn teksertıp, qajettı därılerın de ışulerıne jaǧdai jasalǧan. Keşkı astan keiın arnaiy bölıngen kölık olardy üilerıne jetkızıp salady da, erteŋgısın taŋerteŋ osynda taǧy alyp keledı. Osylaişa, olar mūnda on kün demalady.
«Bala-şaǧalary joq, jalǧyzılıktı qarttardyŋ köbıne öz betterımen eşqaida bara almaityny belgılı. Ūzaqty kün üilerınde otyratyn 150 adamdy byltyr bırınşı ret qala ışındegı demalys ornyna aparyp, sauyqtyruǧa septıgımızdı tigızgen edık. Sol dästürdı jalǧastyrǧan qalalyq ardagerler keŋesı demeuşılerdıŋ kömegımen biyl taǧy osynşa adamnyŋ demaluyna jaǧdai jasap otyr. Bır aita keterlıgı, mūnda kez kelgen qart adam demala almaidy. Būl rette bızdıŋ basty maqsatymyz – kezınde eldıŋ damuyna eŋbek etken jandardyŋ, bügınde bögde bıreulerdıŋ kömegınsız, öz betımen jüre alatyn tyl ardagerlerı men jasyna bailanysty zeinetke şyqqan jalǧyzılıktı qariialardyŋ demalysyn ūiymdastyru» deidı Amankeldı Hamzeūly.
Qariialar mūnda mausym aiynyŋ 10-ynan 1qazanǧa deiın demalady. Osyǧan orai, ızgılıktı şarada Astanadaǧy üş audannyŋ da qarttary qamtylmaqşy. Degenmen, demalys ornyna aldymen Saryarqa audanynyŋ jalǧyzılıktı zeinetkerlerı barady. Aldyn ala berıletın tızım boiynşa olardyŋ 15-ı qazırdıŋ özınde daiyn otyr.
Jalpy, Astanada qazırgı taŋda Jūmyspen qamu jäne äleumettık baǧdarlamalar basqarmasyna jalǧyzılıktı, qamqorlyqqa zäru zeinetker retınde 361 adam tırkelgen. Olarǧa qalalyq äkımdık tarapynan türlı qamqorlyqtar jasaluda.
Gülbarşyn ÖKEŞQYZY
