Elımızde alǧaş ret gipotermiia apparaty Ūlttyq ana men bala ortalyǧynda qoldanysqa berıldı. Atalmyş qūrylǧy närestelerdı emdeu kezınde dene qyzuyn tolyq baqylauǧa mümkındık beredı.
Qazırgı uaqytta ıştegı näreste men jaŋa tuǧan balanyŋ gipoksiia jäne perinataldyq insultten paida bolǧan serebraldyq būzyluy – neonatologiiadaǧy eŋ özektı mäsele. Nevrologiialyq emdeudıŋ eŋ tiımdı ädısı – terapevtık gipotermiia. Ol degenımız – emdeluşı säbidıŋ mi qyzuyn qadaǧalap, ony tömendetetın medisinalyq metodika. Äsırese, tynys alu būzylǧan kezde, jürekke ota jasaǧanda, jasandy qan ainalymy kezınde mi dertınıŋ ärmen qarai asqynuyna jol bermeidı.
Būl qūrylǧyny satyp aluǧa «Aiala» qaiyrymdylyq qory qoldau körsetken. Naqtyraq aitsaq, qūny 11 350 000 teŋge tūratyn apparatty satyp aluǧa qordyŋ serıktes-demeuşılerı – ADD Capital jäne Chevron kompaniialary – kömektesken. Sonymen qatar, 2 900 000 teŋgenı «Astana marafon-2017» qatysuşylary jinaǧan.
«Bügınde eŋ qūndy bailyq – adamdardyŋ densaulyǧy. Sapaly qyzmet körsetu üşın soǧan säikes joǧary tehnologiialyq qūraldar boluy tiıs. Būl apparat – säbilerdıŋ densaulyǧy üşın eŋ qajettı jabdyqtardyŋ bırı. «Aqyldy» qūrylǧy balanyŋ jaǧdaiyn jıtı baqylauǧa kömektesedı. Därıgerlerdıŋ jūmysyn jeŋıldetıp, balanyŋ em aluyna jailylyq syilaidy. Ortalyqta jyl saiyn 4 myŋ bala düniege keletın bolsa, sonyŋ 8-10 paiyzy osy apparattyŋ kömegıne mūqtaj edı» deidı Ana men bala ortalyǧy reanimasiia bölımınıŋ meŋgeruşısı Botagöz Äubäkırqyzy.
Aita keteiık, Densaulyq saqtau ministrlıgı men «Aiala» qaiyrylymdylyq qory osy apparatty qoldanudyŋ ädıstemesın de qūrastyrǧan. Endı aldaǧy uaqytta Astana jäne Almaty qalalarynda elımızdıŋ barlyq öŋırındegı neonatologtar men meiırbikelerdı şaqyryp, täjıribelık treningter ūiymdastyrmaqşy.
Gülmira ŞARHANQYZY
