Bas qalada «Otandastar» tūrǧyn üi keşenınıŋ aulasynda jaŋa belsendı ūzaq ömır süru ortalyǧy aşyldy.
Saltanatty tūsaukeser räsımıne qatysqan Nūr-Sūltan qalasy äkımdıgınıŋ «Belsendı ūzaq ömır süru ortalyǧy» KMM direktory Mūhtar Erketaev bügıngı taŋda bas qalanyŋ tört audanynda osy ortalyqtyŋ tört filialy jūmys ısteitının atap öttı.
– Mūndai ortalyqtardy köptep aşudaǧy basty maqsatymyz – aǧa buyn ökılderıne ruhani qoldau körsetu jäne olardyŋ densaulyǧyn saqtauǧa kömektesu. Egde adamdardyŋ qatarlastary kemıgen saiyn aralasatyn, äŋgımelesıp, şüiırkelesetın kısı tappaityny şyndyq. Sony eskere otyryp, bız zeinetkerlerdıŋ özderı sekıldı adamdarmen köbırek kezdesıp, pıkırlesuıne jol aştyq. Özara qarym-qatynas – äleumettık belsendılıktı saqtaudyŋ negızgı şartynyŋ bırı. Jūrt bızge äleumettenu jäne sauyqtyru mäselelerıne kömektesu üşın jügınedı. Bız sondai-aq egde jastaǧy adamdarǧa jastarmen de bailanys ornatuǧa kömektesemız. Būl rette bailanystyruşy jıp üzılmeidı. Al osy täjıribe eresek jandardyŋ özara ruhani baiuyna alyp keledı» dedı KMM direktory.
Ortalyqtyŋ aşyluy barysynda «Otandastar» tūrǧyn üi keşenınıŋ aulasyndaǧy sport alaŋynda sigun tynys alu gimnastikasy boiynşa körsetılım, sonymen bırge muzykalyq konsert öttı. Sondai-aq şaraǧa qatysuşylarǧa toǧyzqūmalaq oiyny üiretıldı.
«Bes tarmaq» jekpe-jek mektebınıŋ jetekşısı Janat Tūiaqbaev bolsa zeinetkerlerge arnap sabaq ötkızdı. Onyŋ aituynşa, sigun jattyǧulary men sauyqtyru gimnastikasy egde adamdardyŋ küş jinap, denenı nyǧaituyna, jalpy ömır süruge degen qūştarlyǧyn arttyruǧa alyp keledı.
«Ortaşa alǧanda, alty jerde ötkızıletın osyndai sabaqqa 300-ge juyq qala tūrǧyny qatysady. Jyl saiyn olardyŋ sany artyp keledı» dedı J.Tūiaqbaev.
Onyŋ şäkırtınıŋ bırı – zeinetker Däuletbike Sūltanova. Aituynşa, 73 jasta, aǧylşyn tılı kursyna baryp jür, jaqynda türık tılınen sabaq bastalady, soǧan qatysudy josparlap otyr.
«Bügınge deiın üş jyl boiy sigundaǧy «Belsendı ūzaq ömır süru ortalyǧyna» baryp jürmın, janyma jaily, maǧan ūnaidy. Būl – energiia közı, dūrys tynys aludyŋ kepılı jäne densaulyqty nyǧaitudyŋ keremet täsılı» dedı zeinetker.
Sondai-aq ortalyqtyŋ tūsaukeserınde «Saǧynyş sazy» folklorlyq-aspaptyq ansamblı, «Esıl tolqyndary» halyqtyq ardagerler ansamblı, sonymen qatar belgılı oryndauşylar – Talapbek Qydyrbai, Almabek Berdıǧaliev, Zuleiha Ahmetova, Altynbek Beisembaev, Qarjoz Şpanūly, Särsenbai Şpanūly söz söiledı.
«Saǧynyş sazy» folklorlyq-aspaptyq ansamblınıŋ jetekşısı Külzaǧila Barlyqovanyŋ mälımdeuınşe, atalmyş ansambl 2009 jyldyŋ jeltoqsan aiynda aşylǧan. Qatarynda 68 jastan asqan 20-dan asa adam bar, olardyŋ bärı belsendı ömır saltyn ūstanady. Olar än salyp, küi şertedı, aralarynda jyraular, zamanaui estrada änşılerı de bar, barlyǧy bırıgıp konsertte öner körsetedı. Osylaişa şyǧarmaşylyǧyn şyŋdauǧa mümkındık tudyrǧany üşın olar osy ortalyqty ūiymdastyruşylarǧa alǧysyn aitty.
– Bızde 2 myŋnan astam zeinetker tegın qatysatyn 15 üiırme, 2 halyq ansamblı bar. 9 mausymda modelderımız Tarazda «Aspara Fashion Week» halyqaralyq sän aptalyǧyna qatysyp, laureat atandy. Zeinetkerlerdı ortalyǧymyzǧa köbırek tartu üşın qyzmet körsetemız. Sol sebeptı osy tūsaukeser men konserttı ūiymdastyrdyq, – dedı «Belsendı ūzaq ömır süru ortalyǧy» KMM mädeni ūiymdastyruşysy Läzzat Öteǧūlova.
Is-şara barysynda zeinetkerler ūlttyq kiımder körsetılımın ötkızdı.
Gülbarşyn Ökeşqyzy
