Qaladaǧy Jambyl Jabaev atyndaǧy №4 mektep-gimnaziiada belgılı jazuşy, Qazaqstannyŋ eŋbek sıŋırgen qairatkerı, Halyqaralyq «Alaş» ädebi syilyǧynyŋ laureaty Şärbanu Beisenovamen kezdesu boldy.
Būl şarany ötkızuge «Qyzǧaldaq» qyzdar klubynyŋ jetekşısı Dämeş Ömırbekqyzy ūiytqy boldy. Jylylyqqa toly jüzdesude belgılı aqyn, ǧalym Janat Äskerbekqyzy Şärbanu Qonaqbaiqyzynyŋ ömır joly men şyǧarmaşylyǧy jaiynda baiandama jasady. Odan keiın jazuşynyŋ özı söz alyp, «Ūly dala arulary» seriiasymen jaryq körgen Süiınbike hanym turaly köpşılık bıle bermeitın tyŋ derekterdı söilettı.
«Men ūzaq jyldar «Qazaqstan äielderı» degen jurnalda jūmys ıstedım. Sonda jürgende «Azattyq jolynda qūrban bolǧan arular» degen aidar aşyp, aldymen Süiınbike hanym jaiynda materialdar berdık. Sodan berı ol turaly zerttep kelemın. Janat Äskerbekqyzy ekeumız Qazan qalasyna baryp, ondaǧy ūlt ziialylarymen jüzdesıp, kıtaphanalardaǧy köne kıtaptarmen tanysyp, köptegen mälımetter alyp qaittyq. Süiınbike – XIV ǧasyrdaǧy Altyn ordanyŋ yqpaldy tūlǧasy bolǧan bahadür batyr Edıge bidıŋ tıkelei ūrpaǧy. Bız mūny şejıreşılerdıŋ jazǧanyna süienıp aityp otyrmyz. Qaharly İvan Groznyidyŋ otarşyldyq saiasatyna qarsy küresken. Halyqqa qaiyrymdylyǧymen, ädıldıgımen qadırlı bolǧan» dep jinalǧandarǧa ūlaǧatty söz örbıttı. Sondai-aq, suretker Süzge hanşaiym men basqa da şyǧarmalary jaiynda äŋgımeledı. Oquşylar söz zergerınıŋ aitqandaryn ūiyp tyŋdap, arasynda sūraqtar qoiyp otyrdy.
Bır qyzyǧy, men Şärbanu Qonaqbaiqyzyn ötken ǧasyrdaǧy jetpısınşı jyldardyŋ ortasynan berı bılemın. Dälırek aitqanda, 1976 jyly Qorǧaljynǧa ıssaparmen kelıp, öz qolymmen qūrǧan audandyq ūlt aspaptar orkestrı jaiynda
«Mädeniet jäne tūrmys» jurnalyna maqala jazǧan edı. Sodan berı de bırtalai jyldar öttı. Endı, mıne, jolymyz taǧy bas qalada tüiıstı. Qysqasy, jazuşymen bolǧan kezdesu jas oqyrmandarǧa ruhani läzzat syilady.
Ospan SÜLEIMENOV,
QR bılım beru ısınıŋ üzdıgı
