JOLAUŞYǦA QYZMET SAPALY JOLDAN BASTALADY
Qalalyq mäslihattyŋ mäjılıs zalynda ötken döŋgelek üstel barysynda elordadaǧy köşe-jol jelısın damytu jäne qoǧamdyq kölık qyzmetın jaqsartu turaly mäsele talqylandy.
Mäslihat hatşysy S.Esılov bügıngı basqosudyŋ aldynda bır top deputattar elordadaǧy kölık käsıporyndarynda bolyp, avtobus baǧyttarynyŋ jūmysymen jaqynyraq tanysyp-zerttep, özderınıŋ ūsynystaryn Jolauşylar kölıgı jäne avtomobil joldary basqarmasyna joldaǧanyn jetkızdı.
Bügınde qala tūrǧyndarynyŋ jyldam ärı yŋǧaily jürıp-tūruyn qamtamasyz etu basty problemalardyŋ bırıne ainalyp otyr. Būl rette qalalyq Jolauşylar kölıgı jäne avtomobil joldary basqarmasynyŋ bastyǧy Raşid Amanjolov deputattardy osy salada atqarylyp jatqan jūmystarmen tanystyrdy.
«Elorda joldaryndaǧy jüktemenıŋ joǧarylyǧy özderıŋızge mälım» dep bastaǧan basqarma bastyǧy odan ärı Astanada jalpy ūzyndyǧy 946 şaqyrymdy qūraityn 952 köşe baryn, solardyŋ jetpıs paiyzǧa juyǧy asfalttalǧanymen, qalǧan 287 şaqyrym jolǧa tas töselmegenın aitty.
SÜBELI SÖZ
Qoǧamdyq kölıkter turaly aitar bolsaq, Astanada täulık boiy 669 myŋ jolauşyny tasymaldaityn 8 avtopark, 941 avtobus jūmys ısteidı eken. Degenmen, qoǧamdyq kölık qyzmetıne köŋılı tolmaityndar qatary azaimai otyr. Mäselen, 2012 jyly tūrǧyndardan 1914, al ötken jyly 2524 ötınış-şaǧym tüsse, byltyr Astanada 254 jol-kölık oqiǧasy tırkelgen.
Soŋǧy alty jylda bas qalada 406 avtobus satyp alynypty. Soǧan qaramastan, qoldanystaǧy kölıkterdıŋ 17 paiyzy tozǧan, 14 jyldan berı paidalanylyp jürgen eskı kölıkter körınedı.
– Jürgızuşılerdıŋ tūraqtamauy da būl saladaǧy basty problemalardyŋ bırınen sanalady. Qazırgı taŋda qaladaǧy kölık käsıporyndaryna älı de 700 adam jetıspeidı. Osyǧan orai, bız halyqaralyq täjıribenı zerttedık. Sonyŋ nätijesınde, aldaǧy uaqytta kölık jürgızuşılerın oqytu jäne bılıktılıkterın arttyru jönındegı jaŋa ortalyq qūrylady, – dedı Raşid Amanjolov. – Ol negızınen psihologiialyq treningterden tūrady. Iаǧni, jürgızuşı simuliatorǧa jıberılmes būryn testıleuden ötedı. Simuliatorlar satyp alynady. Oqytu baǧdarlamasy 80 saǧatty qūraidy. Onyŋ basym bölıgı naq osy psihologiialyq ahualǧa arnalady. Adam özın qalai ūstaidy? Oǧan avtobusqa otyruǧa bola ma, älde, ol mehanik boluǧa ǧana jarai ma? Osynyŋ bärı tekserıledı. Atalǧan ortalyq säuır aiynda öz jūmysyn bastaidy.
Üstımızdegı jyly ai saiyn 80 adamdy oqytu közdelıp otyr.
Sonymen bırge qalalyq Jolauşylar kölıgı jäne avtomobil joldary basqarmasy basşysy sol jaǧalaudaǧy Esıl özenı boiynda ornalasqan äkımşılık ortalyq pen Qosşy tūrǧyn alabyna jyldam jetu turaly elordalyqtardyŋ ötınışınen keiın üstımızdegı jyldyŋ 5 nauryzynan bastap №52 jürdek marşruty ūiymdastyrylǧanyn, onyŋ «Aimaqaralyq auruhana» – «Lesnaia poliana» tūrǧyn alaby arasynda qatynaitynyn, dei tūrǧanmen aldaǧy uaqytta avtobus baǧyttary qala tūrǧyndaryna qolaily boluy üşın qozǧalys kestesı jüielenıp, täulıktıŋ ärtürlı uaqytyndaǧy kölıktık jükteme körsetkışterın jäne taǧy basqalardy eskere otyryp, zamanaui kölık modelın engızu qolǧa alynatynyn aitty. Demek, būǧan deiın otyz şaqyrymǧa deiıngı aralyqqa qatynaityn avtobustardyŋ baǧyty endı ekıge bölınıp, är avtobustyŋ 15 şaqyrymǧa qatynauy közdelude. Osynyŋ nätijesınde endı bır ǧana qoǧamdyq kölıkke mınıp alyp, qalany tügel aralap şyǧu mümkın bolmaityn siiaqty.
Biyl 350 jaŋa avtobus satyp alynady. Sondai-aq, «IVECO» kompaniiasymen jasalynǧan kelısımşart negızınde üstımızdegı jyldyŋ mamyr aiynan bastap bırtındep su jaŋa avtobustar kele bastaidy, al 2017 jylǧa deiın jalpy sany 850 avtobus satyp alynady.
Gülbarşyn ÖKEŞQYZY