Astana qalalyq Jūmyspen qamtu ortalyǧy qyzmetkerlerınen jasaqtalǧan mobildı top müşelerı elordadaǧy Ortalyq bazar aumaǧynda ekınşı köşpelı aqparattyq-nasihattyq jūmystaryn jürgızdı.
Aita keteiık, bırınşı köşpelı şara 30 säuır men 1 mamyr künderı aralyǧynda «Han-şatyr» sauda ortalyǧy aumaǧynda jürgızılgen bolatyn. Nätijesınde jūmysqa ornalasuǧa 73 azamatqa joldama berıldı. Endı, mıne, adamdar tyǧyz şoǧyrlanǧan Ortalyq bazar töŋıregı de bekerge taŋdap alynbaǧan.
– Bızdıŋ maqsatymyz – adamdarǧa tūrǧylyqty jūmys ūsynu. Bazar maŋaiynda zaŋsyz jūmys ısteuşıler köp boluy mümkın. Sondyqtan, azamattarǧa naqty jūmysqa ornalasuǧa joldama berıledı. Top müşelerı jarty saǧat ışınde 20 adamǧa joldama berıp ülgerdı. Oǧan köpşılıktıŋ qyzyǧuşylyǧy da joǧary. Olarǧa jaŋa mamandyqty igeru üşın qaita daiarlyq oqytudy ūsynamyz. Äsırese, medisina, polisiia, balabaqşa tärbieşısı, energetika men qyzmet körsetu salalary boiynşa bos jūmys oryndary jeterlık, – dedı Jūmyspen qamtu ortalyǧynyŋ direktory Oljas Omar.
Sondai-aq, mobildı top müşelerı «Jūmyspen qamtu – 2020 jol kartasy» baǧdarlamasy men Jastar praktikasy jaiynda tereŋırek tüsınık berdı.
Azamat ESENJOL
