JYLYTU MAUSYMY BASTALDY
Astana qalasy äkımınıŋ arnaiy tapsyrmasy boiynşa äkımdık janynan baspasöz ortalyǧy aşylǧan bolatyn. Keşe osy ortalyqta Astana qalasynyŋ Energetika basqarmasy jylytu mausymyna bailanysty alǧaşqy baspasöz mäslihatyn ötkızdı.
Aldymen söz alǧan Energetika basqarmasynyŋ basşysy Baqytbek Japaev 1 qazannan jylu beru bastalatynyn mälımdedı.
– Bırınşı kezekte qalanyŋ äleumettık nysandaryna jylu berıledı. Qazırgı uaqytta densaulyq saqtau, bılım jäne mädeniet nysandary jylytu mausymyna 100 paiyz daiyn. Energiia közderı, injenerlık jelıler jäne tırşılıktı qamtamasyz etu nysandaryndaǧy tiıstı jūmystar uaqytynda aiaqtalǧan bolatyn. Belgılengen kesteden qalyp qoiu jaǧdaiy tırkelgen joq. Elordada 2454 tūrǧyn üi qory tırkeuge alynǧan bolsa, ondaǧy daiyndyq jūmystary tolyq aiaqtaldy dese bolady, – dep mälımdedı basqarma basşysy.
Onyŋ aituynşa, biyl «Astana-Teplotranzit» AQ baǧdarlamaǧa säikes 1,150 şaqyrym magistraldı jelıge kürdelı jöndeu jūmystaryn jüz paiyz oryndap şyqqan. Al 3 698 şarşy metr qūbyrdyŋ jylu oqşaulaǧyştary qaita jöndelgen. Sondai-aq «Astana-REK» AQ-y da özderı jasaqtaǧan baǧdarlama negızınde 3631 şaqyrym ūzyndyqty qūraityn äue elektr jelısınıŋ bıraz bölıgın kürdelı jöndeuden ötkızgen. Audandyq qazandyqtarǧa 19 myŋ tonna kömır otyny qajet bolsa, sonyŋ 16 myŋ tonnasy qazırdıŋ özınde jasaqtalǧan eken. Negızınde, kömır jetkızu jūmystary kestege säikes qazan aiynan bastalady. Qalany jylumen qamtityn JEO-1 jäne JEO-2-nıŋ daiyndyǧy da jüz paiyz kölemınde oryndalǧan.
– Özderıŋız bılesızder, jylu üş kezeŋ boiynşa berıledı. Bırınşı kezeŋde 1 qazannan tiıstı nysandar jyluǧa qosylady. Ekınşı kezeŋde tūrǧyn üi qoryna jylu berıluı tiıs. Ol aua raiyna bailanysty jüzege asyrylady. Aua temperaturasy 10 gradus jylylyqtan tömendese jäne ol bes künnen astam uaqytqa jalǧassa, tūrǧyn üilerge de jylu berıle bastaidy. Al üşınşı kezeŋde zaŋdy tūlǧalardyŋ nysandary qosylady, – dep tüsındırdı baspasöz jiynyna qatysqan «Astana-Teplotranzit» AQ basqarmasynyŋ töraǧasy Vasilii Kurisko.
Meŋdolla NŪRYMŪLY