Астана әкімі Әділбек Жақсыбековтың қатысуымен Қазақстан Республикасы мәслихаттарының құрылғанына 20 жыл толуына орай ұйымдастырылған салтанатты жиын өтті.
Жиынды Астана қалалық мәслихатының хатшысы Сансызбай Есілов жүргізсе, алғашқы сөзді қала әкімі алды. Әділбек Жақсыбеков өз сөзінде қалалық мәслихаттың қызметі мен шешімдері әр астаналыққа қатысты екенін айта келіп, жергілікті заң шығарушы орган ретінде мәслихаттың мемлекеттік саясатты жүзеге асыруда ерекше үлесі бар екенін жеткізді. Сондай-ақ, мәслихат сессияларында елорданы дамытуға қатысты ең өзекті мәселелер бойынша шешімдер қабылданғанына тоқталды.
Бұған қоса, Әділбек Жақсыбеков мерейлі даталардың сәйкестігіне де назар аударды. Тура 20 жыл бұрын Мемлекет басшысы Нұрсұлтан Әбішұлы Назарбаев мемлекет астанасын Ақмола қаласына, бүгінде барша елге сүйікті Астанаға ауыстыру туралы шешімін жариялаған болатын.
«Сол 1994 жылы әлеуметтік-экономикалық талаптар жаңа көзқарасты, барша басқарушылық жүйені қайта құруды, нарықтық экономика заңдылықтарына негізделген өмір сүру тәртіптерін енгізуді талап еткен болатын. Сондай тарихи маңызды кезеңде қалалық мәслихат депутаттары елорданың қалыптасуына зор үлесін қосты» деді әкім.
Жиын барысында елорда басшысы Қазақстан Республикасының әлеуметтік-экономикалық дамуына және жергілікті өзін-өзі басқаруды қалыптастыруға қосқан үлесі үшін бірнеше депутатты медальдармен және құрмет қағаздарымен марапаттады.
Елорданың жергілікті өкілдік органы – Астана қаласы мәслихатының хатшысы Сансызбай Есілов те барлық депутаттар алдында Мемлекет Басшысы көрсеткен «Қазақстан-2020» стратегиясы және Елбасының «Нұрлы жол – болашаққа бастар жол» атты Жолдауындағы бағдарламаларды іске асыру жөнінде аса маңызды міндеттер тұрғанын тілге тиек етті.
«Болашаққа ұмтылған жаңа Қазақстанның алғашқы қадамдары ретінде 1993 жылы Конституция мен «Жергілікті өкілеттік және атқарушы органдары туралы» заңның қабылдануын айтуға болады. Аталған Заңның қабылдануынан бастап Қазақстанның өкілеттік органдары өз тарихын күні бүгінгі дейін маңдай терімен жазып келеді. Сонымен қатар, 1994 жылы жергілікті өкілдік органдары, мәслихаттарға алғашқы депутат сайлаулары өткен болатын. Ал 1994 жылы 1 сәуірде Ақмола қалалық мәслихатының бірінші сессиясы өтті деді мәслихат хатшысы.
Нұрислам ҚҰСПАНҒАЛИ
