Елордадағы «Жастар» театрында Қазақстан халқы тілдерінің ХІХ фестивалі аясында қалалық Тілдерді дамыту басқармасының ұйымдастыруымен «Рухани жаңғыру отбасынан басталады» деген әдеби-сазды кеш өтті.
Отбасы – кез келген адам үшін қастерлі ұғымдардың бірі. Оны шағын мемлекетке теңесек, сол мемлекеттің мүшесі саналатын ұрпақтың саналы азамат болып өсуіне ата-ананың қосар үлесі зор. Айтулы кеште отбасы құндылығы ұлықталды.
Шара шымылдығын Тілдерді дамыту басқармасының басшысы Тілеуғали Қышқышбаев ашты.
– Бүгінгі кештің мақсаты ата-бабамыздан мирас болған отбасылық құндылықтарды дәріптеу, жастарды отбасылық тәрбиеге баулуды көздейді. Халқымыздың сан ғасырлық отбасылық дәстүрі қалыптасқан. Жастар сол жолды мұрат тұтса, еліміздің келешегі жарқын болады, – деп ол жиналған қауымға ізгі тілегін жеткізді.
Әдеби кешке әр салада табысқа жетіп, көпке үлгі болған отбасылар шақырылған. Шараға білікті дәрігер Қайрат Айдарханұлы, әлемнің бірнеше тілінде ән айтып, елді тамсандырып жүрген Нұрболат пен Анар Арзамас, қазақ өнерінің мақтаныштары Медет Салықов пен Клара Төленбаева, балаларын спортқа баулып, жетістіктерге жеткен Әлкей Қуаныш, өрт сөндіруші Жомарт Құдабаев қатысты. Одан бөлек, ағайынды Жүгінісовтер, талантты әнші Құрмаш Маханов, жас әнші Жандос Айдынұлы өнер көрсетті. Тағылымды әңгіме өрбіді. Ұлттық тәрбие мен қазақтың өнегесін дәріптейтін қойылымдар ұсынылды. Отбасы тұтастығы туралы бейнероликтер көрсетілді.
Шара соңында «Бақытты отбасы» атты үздік фотосурет байқауының үздіктері анықталып, жеңімпаздар бағалы сыйлықтармен марапатталды.
Азамат ЕСЕНЖОЛ
