Отбасын әлеуметтік қолдаудың жаңа форматы
Атаулы әлеуметтік көмек әлеуметтік жағдайы төмен отбасыларға ғана ақшалай төлемдер түрінде және жеке ісін бастауға, оқытуға, жұмысқа орналасуға қолдау көрсету арқылы отбасын өмірлік қиын жағдайдан шығаруға көмектесуге бағытталғаны атап айтылды. ҚР Парламенті Мәжіліс депутаты, Әлеуметтік-мәдени даму комитетінің төрайымы Гүлшара Әбдіқалықова жергілікті деңгейде мұқтаж отбасыларды иерархиялау қажет екендігін атап өтті. АӘК-тің бірқатар мәселелері жайында әңгіме өрбіткен едік.– Гүлшара Наушақызы, атаулы әлеуметтік көмектің мәні неде?
– Әлеуметтік жаңғырту мәселелері барлық уақытта кез келген елдің мемлекеттік саясатының негізгі басымдықтарының бірі болып табылады. Сондықтан Елбасы Нұрсұлтан Назарбаев экономикалық даму мен қоғамдық игіліктерді қамтамасыз ету, құқық пен әділеттілік қағидаттарына негізделген әлеуметтік қатынастарды бекіту арасындағы теңгерімді табу әлеуметтік жаңғыртудың мәні болып табылатынын атап өтті. Мемлекет өзінің экономикалық мүмкіндіктеріне қарай халыққа әлеуметтік көмектің көлемі, құрамы, мазмұны бойынша шешім қабылдайды. Мәселен, Ұлыбританияда жұмысқа орналастыруды көтермелеу, табысы аз адамдарды жұмыс іздеу дағдыларына оқыту шаралары енгізілді. Ал Германияда 2016 жылдан бастап жұмыс іздеп жүрген адамдарды материалдық қамтуға арналған әлеуметтік көмек мөлшері артты. Өз кезегінде, Францияда әлеуметтік көмек төлеу үшін азамат мұқтаждығын тексеру және бағалау тетіктері арқылы өтуге тиіс.
Бұл ретте аса мұқтаждарға қолдау көрсетудің бірыңғай өлшемшарты, сондай-ақ оларды жұмысқа орналастыру және өмірлік қиын жағдайдан шығу үшін жағдай жасау басты константа болып қала береді.
– Қазақстанда кедейлікті бағалау деңгейі қалай?
– Бүгінгі таңда Қазақстанда кедейлікті бағалаудың деңгейі– ең төменгі күнкөрістің 70%-ы (20 789 теңге). Халықаралық сарапшылар кедейлік шегінің оңтайлы деңгейі ең төменгі күнкөріс деңгейі болып табылатынын атап өтті. Сондықтан біздің ойымызша, кедейшілік шегін одан әрі ең төменгі күнкөріс деңгейіне дейін ұлғайтуды қамтамасыз етуге мүмкіндік беретін теңдестірілген қаржы-экономикалық модель құру мемлекеттік органдардың өзекті міндеттерінің бірі болуға тиіс. Бұл ретте ең төменгі күнкөріс шамасының өзі халықтың нақты сатып алу қабілетіне сәйкес келуге және адамның барынша аз қажеттіліктеріне жауап беруге тиіс.
Бұл жұмыс басталып кетті. Осы жылдың 1 сәуірінен бастап атаулы әлеуметтік көмек көрсету өлшемшарты ең төменгі күнкөрістің 50-ден 70%-ына дейін ұлғайтылғанын, ал табысы аз отбасынан шыққан әрбір балаға әлеуметтік көмектің кепілді мөлшері белгіленгендігін білесіздер.
Бұл атаулы көмектің мөлшерін 2,5 есе арттыруға мүмкіндік берді. Бір қарағанда бәрі жақсы сияқты. Алайда табысы аз азаматтарды қолдау шараларын іске асыру жаңа форматтағы атаулы көмектің тиімділігін төмендететін бірқатар елеулі кемшіліктерді анықтады.
– Ол қандай кемшіліктер?
– Ең әуелі, мемлекеттік органдар оқиғалардың бұлай өрбуіне дайын емес болып шықты. Жүйелі
жұмыстың болмауы салдарынан жағымсыз аспектілерге тап болдық. Бұл – жұмыс іздеу уәжінің азаюы, әлеуметтік қамсыздандыруды ұзақ уақыт пайдалану ниеті, әлеуметтік көмекті көбірек алу мақсатында отбасы мәртебесін немесе тұрғылықты жерін формальды түрде өзгерту.
Жергілікті жерлерде әкімдіктер табысы аз азаматтардың проблемаларын шешуге келгенде өмірлік қиын жағдайға әкеп соққан себептерге терең үңілмейді.
– Бұл мәселелер қалай шешілмек?
– Аталған жағдайды шешу үшін шаралар қабылданып, әлеуметтік көмекке мұқтаждықты айқындау, учаскелік комиссиялардың рөлін күшейту өлшемшарттары бекітілді. Отбасын жекедара алып жүру тетігі отбасын әлеуметтік қолдаудың жаңа форматының түйінді элементі болуға тиіс. Практикада әлеуметтік сүйемелдеу формальды түрде жүзеге асырылады және жұмыспен қамтуға жәрдемдесу шараларына қатысатын әлеуметтік көмек алушылардың міндетті зейнетақы жарналарының уақтылығы мен толықтығының мониторингімен шектеледі.
Өйткені атқарылатын жұмыстың барлығы жұмыспен қамту орталығының қызметкерлеріне, атап айтқанда, әлеуметтік жұмыс жөніндегі консультанттар мен ассистенттерге жүктелген. Бұл ретте жұмыспен қамту орталығының басты міндеті жұмыспен қамтуға жәрдемдесу болып табылады. Сол себепті бұл қызметкерлердің жұмыстары «басынан» асып жатады.
– Енді қандай шаралар қолдану керек деп ойлайсыз?
– Әкімдіктер бұл жұмысқа деген мұндай тәсілді тез арада өзгертулері керек. Отбасына қолдау көрсету жұмыстарын жергілікті жердегі әлеуметтік қорғау бөлімдері мен ауыл әкімдеріне жүктеу қажет деп ойлаймыз.
Мемлекеттің көпбалалы және табысы аз отбасыларын әлеуметтік қорғауға кететін шығындары елдегі адами капиталдың тұрақты дамуы үшін іргелі факторлардың бірі болып табылады.
– Атаулы әлеуметтік көмек берудегі өзгерістерді айта кетсеңіз?
– Атаулы әлеуметтік көмек алатындардың ішінде 40 пайызға жуығы көпбалалы отбасылар екендігін атап өту керек. Олар көбіне материалдық тұрғыдан «әлсіздеу» болады, сол себепті олардың материалдық әл-ауқатының төмендемеуінің алдын алатын тиісті шаралар қабылдау қажет.
Ол үшін Президент Қасым-Жомарт Тоқаевтың
берген тапсырмасы шеңберінде 2020 жылдың 1 қаңтарынан бастап көпбалалы отбасылардың балалары үшін жаңа жәрдемақы енгізу және табысы аз отбасы балаларына арналған кепілдендірілген әлеуметтік пакет қабылдау жоспарланып отыр. Бұл өзгерістерді халыққа түсіндіру маңызды.
– АӘК-те қандай мәселелер бар?
– Мына бір мәселелерге көңіл аударғым келіп отыр.
Бірінші, өткен жылы «Атаулы әлеуметтік көмектің жаңа форматын енгізу барысы туралы» деген тақырыптағы Үкімет сағатында Ауыл шаруашылығы министрлігіне жеке қосалқы шаруашылықтан түсетін табысты айқындау нормативтерін қайта қарап, бекіту туралы ұсыныс берілген болатын. Бірақ бұл мәселе әлі күнге дейін шешімін тапқан жоқ. Тексеру кезінде, әсіресе ауылдағы үй шаруашылығын тексеру кезінде олардың табыстарын асыра бағалау немесе жете бағаламау қаупі бар. Жаңа жылдан бастап бұл мәселе алдымыздан тағы шығады. Мұның алдын алу қажет.
Осыған байланысты отбасының жеке қосалқы шаруашылықтан түсетін жиынтық табысын есептеуді базалық бағалау үшін мемлекеттік органдар қысқа мерзім ішінде жаңа әдістемелік ғылыми-практика базасында қалыптасқан орта бағаны ескере отырып өнім өндіруге арналған шығындардың нормативтік деңгейін қайта қарастыруы қажет. Екінші, өңірлерде Атаулы әлеуметтік көмектен басқа мәслихаттардың шешімі бойынша әлеуметтік қолдау көзделген, ол халықтың жекелеген санаттарына көрсетіледі. Бүгінгі таңда бір ғана үй шаруашылығы деңгейінде берілген жәрдемақыны қайта төлеу фактілері жиі кездеседі. Өңірлердегі бастаманы қолдай отырып, жергілікті деңгейде мұқтаж отбасыларды иерархиялау қажет екендігін атап өткім келеді.
Жадыра МҰРАТБЕКОВА