ҚАЛЛЕКИЛІКТЕР ЖАҢА МАУСЫМДЫ АШТЫ
Кеше Астанада Қ.Қуанышбаев атындағы мемлекеттік академиялық Қазақ музыкалық драма театрының жаңа ХХVI маусымы жылдағы дәстүрге сай Қазақстанның еңбек сіңірген қайраткері, режиссер Әлімбек Оразбеков қойған «Абай» трагедиясымен ашылды.
ЖЕТІ ПРЕМЬЕРА КӨТЕРГЕН ЖҮК
Оның алдында театр басшылығы мен өнер ұжымының негізін қалаушы әртістердің қатысуымен өткен баспасөз мәслихатында былтырғы ХХV маусымдағы жетістіктер қорытындыланып, алдағы жоспарлар туралы айтылды.
Театр ұжымы артта қалған маусымда көрермендерге ұсынған премьералар аз болмады. Алдымен режиссер Әлімбек Оразбеков сахналаған әртүрлі жанрдағы қойылымдар жайлы айтайық. Классикаға келетін болсақ, М.Әуезов пен Қ.Ысқақтың «Таңғы жаңғырық» шығармасының желісімен «Қараш-қараш» драмасымен қоса, бұл режиссер осетин драматургі А.Айларовтың «Кепілдікке қалыңдық» туындысын негізге алып, «Сүрінген сүрбойдақ» комедиясын қойды.
Театрдың көркемдік жетекшісі Талғат Теменов Ш.Айтматовтың «Боранды бекет» романы мен «Жәмила» повесінің инсценировкасын жасап, оның нәтижесінде «Аққудың көз жасы» лирикалық драмасы дүниеге келді.
Нұрлан Жұманиязов сахналаған Ж.Ерғалиевтің «Есігімді қаққан кім?» психологиялық драмасы мен Гүлсина Мерғалиева қойған жазушы-драматург Р.Мұқанованың «Сарра» спектаклі көрермендердің санасын сілкіндірді.
Тәжірибе алмасу мақсатында өткен маусымда арнайы шақыртылған шетел режиссерлері де Қаллеки театрында спектакльдерді сахналады. Солардың бірі – Башқұртстанның еңбек сіңірген қайраткері Айрат Абушахманов жас драматург О.Жанайдаровтың «Жұт» драмасын, ал Саха елінен келген режиссер Сергей Потапов А.Чеховтың «Шие» комедиясын қойды.
ҰЖЫМ МЕН АКТЕРЛЕРДІҢ ЖЕТІСТІКТЕРІ
Осы «Шие» комедиясы жуырда өткен ҚР Тәуелсіздігінің 25 жылдығына арналған Қазақстан драма театрларының XXIV республикалық фестивалінде «Үздік спектакль» аталымында топ жарды. Сол сияқты осы театр репертуарындағы «Тыраулап ұшқан тырналар» лирикалық драмасы Мәскеуде өткен XIII халықаралық «Золотой Витязь» театр форумында бас жүлде иеленді. Ал онда рөлдерді сомдаған Қазақстанның Халық әртісі Тілектес Мейрамов пен бас кейіпкерлерді ойнаған Әбілмансұр Серіков және Ақмарал Танабаева фестивальдің дипломанттары атанды.
Актерлердің жеке жетістіктері тақырыбын жалғастыратын болсақ, ХХV маусымда жас актрисалар Сая Тоқманғалиева мен Таңсұлу Баталова «Серпер» жастар сыйлығын иеленсе, Айнұр Бермұхамбетова Қазақстан Театр қайраткерлері одағының «Еңлікгүл» сыйлығының «Жыл актрисасы» аталымында топ жарды.
Ұжымдағы бірнеше әртістің еңбегі мемлекет тарапынан бағаланды. Атап айтсақ, ҚР еңбек сіңірген әртісі Жанат Чайкина «Құрмет» орденінің иегері атанса, Қуандық Қыстықбаев Қазақстан Республикасының еңбек сіңірген қайраткері атағына ие болды. Күні кеше ғана режиссер Ақан Сатаевтың «Анаға апарар жол» картинасында Мәриям бейнесін сомдаған театрдың белді актрисасы, ҚР еңбек сіңірген қайраткері Алтынай Нөгербек «Еуразия» ХІІ халықаралық кинофестивалінде тұңғыш рет тағайындалған отандық «Тұлпар» сыйлығының «Үздік әйел бейнесі» аталымының жүлдесін иеленді.
ТЕАТР РЕПЕРТУАРЫ ТОЛЫҒАДЫ
Өнер ұжымының жаңа маусым жоспарларына келсек, биыл көрерменге Мұхтар Әуезовтің «Қорғансыздың күні», Рақымжан Отарбаевтың «Әміре», Лев Толстойдың «Холстомер», Қабдеш Жұмаділовтің «Ажалдан қашқан періште», Ілияс Есенберлиннің «Қаһар» сынды қойылымдары жол тартпақ.
Ал алдағы қараша айында театр ұжымы Тәуелсіздіктің ширек ғасырлық тойы мен Қаллеки театрының 25 жылдығына арналған республикалық театрлардың фестивалін өткізуді жоспарлап отыр. Онда театрдың негізін қалаушы, режиссер Жақып Омаровтың, одан кейін ұжымға басшылық еткен майталмандар Қадыр Жетпісбаев пен Әзербайжан Мәмбетовтің аттары жаңғыртылып, театр өнеріне қосқан зор үлестері туралы айтылмақ.
«АБАЙМЕН» АЛҒА АДЫМДАДЫ
Өнер ұжымына сахна шебері Қалибек Қуанышбаевтың аты берілген. Оның шығармашылығында Абай рөлі ерекше орынды алатыны көзіқарақты көрерменге белгілі. Тіпті, мұны актердің шоқтығы биік рөлдерінің біріне де балауға болады. Сондықтан қаллекиліктер жаңа маусымды «Абай» трагедиясымен ашуды дәстүрге айналдырды. Өнер ұжымы бұл қойылымды әр қойған сайын үлкен жауапкершілікпен келеді. Бұл жолы да спектакльде екі Абайдың бейнесін көрдік. Аға Абайды ҚР Халық әртісі Тілектес Мейрамов сомдаса, жас Абайды ҚР еңбек сіңірген қайраткері Нүркен Өтеуілов ойнап, жиналған қауымды әдеттегідей тұңғиық ойдың тереңіне батырды.
Сонымен, жаңа маусым ашылды. Әр аптаның сейсенбі-жексенбі күндері театрға келіңіздер, ағайын!
Аманғали ҚАЛЖАНОВ