Астана қаласының әкімі Бақыт Сұлтанов Халықаралық паралимпиялық комитеттің президенті Эндрю Парсонспен кездесті.
Кездесу барысында Бақыт Сұлтанов елорда әкімдігі мен ҚР Ұлттық паралимпиялық комитетінің бірлескен күшімен Астанада мүгедектігі бар жандардың спортпен шұғылдануына мүмкіндік беретін заманауи паралимпиялық жаттығу орталығының ашылғанын атап өтті.
– Қазіргі таңда Астанада мүмкіндігі шектеулі жандарды қолдауға бағытталған бағдарлама жүзеге асырылып жатыр. Сонымен қатар паралимпиялық спорт – өмірдің қиындықтарына қарамастан, адамның ел дамуына өзінің сүбелі үлес қоса алатындығын дәлелдеудің ең тиімді тәсілі. Мүмкіндігі шектеулі жандар қатысатын халықаралық жарыстарда Қазақстанның туы биікке көтерілгенде бойды билейтін мақтаныштан артық сезім жоқ шығар, – деді қала әкімі.
Қазақстанда паралимпиялық спорт түрлерінің дамуына мемлекеттік мекемелердің қолдау көрсетуін жоғары бағалаған Эндрю Парсонс:
– Астанадағы түрлі спорттық орталықтардың жұмысына, паралимпиялық жаттығу орталығының жұмысына тәнті болдым. Спорт кешендерінде мүмкіндігі шектеулі жандарға барлық жағдай жасалыпты, – деді.
Сондай-ақ тараптар жазға қарай Астанада парапауэрлифтингтен әлем чемпионатын өткізу мәселесін талқылады.
