Елорданың «Студенттер» саябағында Астана қаласы әкімдігінің және Жастар саясаты мәселелері басқармасының қолдауымен патриоттық іс-шара өтті. ҚР Мемлекеттік рәміздерінің 25 жылдығына арналған салтанатты шараға халық қалаулылары, қоғам қайраткерлері мен жастар қатысты.
1992 жылдың 4 маусымы – ел тарихындағы айтулы дата. Бұл күн жыл сайын Мемлекеттік рәміздердің туған күні ретінде тойланады.
«Патриоттық шараны ұйымдастыру – біз үшін үлкен құрмет. Рәміздер – ұлтымыздың, еліміздің бейнесі. Оны қорғап, құрметтеу – бүгінгі жастардың асқақ парызы» дейді Астана қаласы Жастар мәслихатының депутаты Дана Көбенова. Оның айтуынша, шара кезінде 200-ге жуық адамның қатысуымен арнайы сауалнама ұйымдастырылған. Онда әрбір азаматтың мемлекеттік рәміздерді қаншалықты білетіндігіне назар аударылды. Нәтижесінде жастардың 85 пайызы оң білімдерін көрсеткен.
Патриоттық іс-шара соңында Алмас Кішкенбаев, Ринат Мальцагов, ағайынды Жүгінісовтер әсем әннен шашу шашты. Ал автошеруге қатысушылар «Студенттер» саябағынан бастап Есілдің сол жағалауына дейін жүріп өтті.
