Дәурен Қасенов,
газет оқырманы:
– Күн жылынған соң қала саябақтарында бала-шағамен серуендеп, демалуды дәстүрге айналдырып келемін. Биылғы жазда саябақтар халыққа қандай ерекше қызықтар ұсынады екен, сол жайында айтып бересіздер ме?
Оқырман сауалына орай қалалық Мәдениет және спорт басқармасы мынаны хабарлайды:
Астананың саябақтары осы жазда астаналықтар және қала қонақтарына көптеген тосынсыйлар дайындап отыр. Саябақтарда жаңа аттракциондар, қызықты шоулар және «Мадагаскар» мультфильмінің кейіпкерлерімен би кештері ұйымдастырылады.
Соңғы бірнеше жылда қалалық саябақтар едәуір жаңарды. Бүгінде олар баршаның сүйікті демалыс орнына айналды. Мәселен, былтыр «Американдық сырғанақтар» аттракционына мінген жандар көп болды. Мұндай аттракцион «Астаналық» саябақта соңғы 10 жылда болмады. Ал биылғы жазда аталмыш саябақта «Бумеранг» атты экстремалды жаңа аттракцион іске қосылады. Ол «Американдық сырғанақтар» аттракционының жанында орналасқан. Жалпы, бұл саябақта кез келген талғамға сай 20-ға жуық аттракцион ұсынылады.
Өткен жылы Астананың саябақтарында «Саябақтың 7 ғажайыбы» атты ойын-сауық жобасы іске қосылған болатын. Жоба көрермендердің көңілінен шығып, танымал мультфильмдердің кейіпкерлері биыл да демалушыларға қуаныш сыйлайды.
Астананың кішкентай тұрғындары мен қонақтарына аниматорлардың және жаңа кейіпкерлердің қатысуымен жаңа шоу ұсынылады. Әртістердің бес тобы қаладағы бес саябақты аралайды және күніне екі қойылымнан көрсетеді. Осы жазда саябақтарда 1000-ға жуық концерт ұйымдастырылмақ.
Биыл «Саябақтың 7 ғажайыбы» жобасы қала тұрғындары мен қонақтарын тағы да бір таңғалдырмақ. Саябақтарда «Мадагаскар» мультфильмінің кейіпкерлері мінген мультмобиль жүреді. Ол адамдар көп жиналған орындарда тоқтап, көңілді би кештерін өткізеді.
Балаларға арналған анимациялық шоулардың апталық кестесімен толығырақ Астана қаласы Мәдениет және спорт басқармасының Инстаграмдағы @madeniet_sport.astana аккаунтынан танысып отыруға болады.
Жазып алған
Аманғали ҚАЛЖАНОВ
