ЫНТЫМАҚТАСҚАННЫҢ ЫРЫСЫ МОЛЫҒАДЫ
«27 маусымда Миланда қазақстандық-италиялық бизнес форумы аясында Астана қаласы әкімінің орынбасары Нұрәли Әлиев Италия өнеркәсібі өкілдерімен және Венгрия басшылығымен ынтымақтастықты одан әрі нығайту жөніндегі бірнеше кездесу өткізді» деп хабарлады қала әкімінің баспасөз қызметі.
Кездесуде Қазақстан машина жасаушылар одағы, италиялық «ANIMA» машина жасаушы және өнеркәсіп ассоциациялары федерациясы мен Астана қаласының әкімдігі арасында машина жасау және өнеркәсіптік өндіріс салаларындағы өзара ынтымақтастық туралы үш жақты келісімге қол қойылды. Аталған келісім шеңберінде Астананың индустриялы аймақтарын дамыту көзделген. Бұл елордаға тікелей шетел инвестицияларын тартады.
Сондай-ақ, 29 маусымда Будапешт қаласының мэриясының шақыруымен Нұрәли Әлиев Венгрия астанасына барды. Ресми сапар барысында Н.Әлиев Будапешт мэрінің орынбасары Габор Багдимен кездесті. Тараптар екі астананың урбанистикалық даму, әсіресе, қоғамдық көлік саласында ынтымақтастықты кеңейту, «Smart city» инновациялық технологияларын, сондай-ақ, ақылы көлік тұрақтарын дамыту жөніндегі көптеген мәселелерді талқылады.
Сонымен қатар, Н.Әлиев Венгрияның Ұлттық экономика министрі Михай Варгамен кездесті. Кездесуде венгер компанияларының «Астана ЭКСПО-
2017» халықаралық мамандандырылған көрмесіне қатысу мәселесі талқыланды. Тараптар бұған дейін қол жеткізілген ауыл шаруашылығындағы жобаларды қаржыландырудың бірлескен қорын құру
туралы келісімдерді іске асыру, қаланы сумен жабдықтау, қосалқы бөлшектер шығару, жиһаз жасау және басқа да салаларда ынтымақтастық орнату мүмкіндіктерін қарастырды.
Бұған қоса, Н.Әлиев ұлттық даму министрі Миклош Шестакпен екі жақты кездесу өткізді. Келіссөздер барысында Шестак мырза Венгрияның Астанадағы «EXPO-2017» көрмесіне қатысатынын жеткізді. Тараптар жоғары технологиялар, энергетика, көлік салаларында ынтымақтастық орнату келешегін, венгер ақылы жолдар жүйесін пайдалану, сондай-ақ, «Нұрлы жол» мемлекеттік бағдарламасы аясында Қазақстанда инфрақұрылымдық жобаларды жүзеге асыру жайын сөз етті.