Сәрсенбі күні Астана әкімінің бірінші орынбасары Сергей Хорошунның төрағалығымен үлестік құрылыс және сәулет пен қала құрылысы қызметіндегі заңнаманы сақтау жөнінде кеңес өтті.
Былтырғы 10 қазанда елімізде «Үлестік қатысу туралы» жаңа Заң қолданысқа енгізілді. Соған сәйкес тұрғын үй құрылысына әкімдіктің рұқсатынсыз халықтан ақша тартуға немесе кепілдеме келісімшартсыз аталмыш жұмысты атқаруға болмайды. Осыны кеңеске қатысушылардың қаперіне салған Сергей Хорошун бұл Заңға бағынбаған құрылыс салушыларға қарсы қылмыстық істер қозғалғанын айтып өтті.
– Ведомствоаралық комиссия жұмысының барысында соңғы екі аптада 23 нысанда пәтерлерді сату бойынша жарнама заңсыз жүргізілгені анықталды. Бұл заңсыздықтарға қатысты материалдар Ішкі істер департаменті мен Мемлекеттік кірістер департаментіне жіберілді. Мұндай келеңсіздікке барған құрылыс салушыларды қылмыстық жауапкершілікке тарту мәселесін прокуратура органдары қадағалауына алды. Бас прокурордың өзі «Үлестік қатысу туралы» Заңын бұзғандарға қатаң жаза қолданылатынын ескертті, – деді қала әкімінің бірінші орынбасары.
Одан кейін баяндама жасаған Мемлекеттік сәулет-құрылысты бақылау басқармасы басшысының орынбасары Дәулет Досқұловтың айтуынша, ҚР Үкіметінің шешіміне сәйкес алдағы 1 шілдеге дейін нысан құрылысын аяқтамаған құрылыс салушылар бұл мерзімнен соң тиісті рұқсатсыз үйді сату жөнінде жарнама жасайтын болса, жазаланады.
– Үлескерлердің қаржысын тартуға рұқсат алған немесе Тұрғын үй құрылысын кепілдендіру қорымен келісімшартқа отырғандар ғана жарнама бере алады. Бүгінгі таңда мұндай рұқсатты 5 компания алды. Атап айтсақ, «Базисинвестстрой» ЖШС, «Компания Триумф Астаны» ЖШС, «Арман қала 21 век» ЖШС, «Шар – Құрылыс» ЖШС, «Корпорация Базис А» ЖШС, – дейді Д.Досқұлов.
Оның сөзінше, 2015 жылдан бастап қазірге дейін ведомствоаралық комиссия жұмысының қорытындысында 100-ден астам нысанды заңсыз сатуға тосқауыл қойылып, былтыр
18 қылмыстық іс қозғалды. Бүгінгі таңда әкімдіктің бақылауында 52 нысан тұр. Кеңес барысында Сәулет және қала құрылысы басқармасы басшысының орынбасары Гүлжан Кивенова үлескерлердің қаржысын тартуға рұқсат алудың тәртібін, ал «Тұрғын үй құрылысын кепілдендіру қоры» АҚ басқарушы директоры Қанат Ибраев аталмыш қор арқылы үлестік құрылысты жүргізу жайын түсіндірді.Бұл кеңеске қатысқан құрылыс компаниялары иелері мен олардың өкілдері өздерін қызықтыратын сұрақтарды қоюға мүмкіндік алды.
Аманғали ҚАЛЖАНОВ
