Қоғамдық денсаулық сақтау басқармасының бірінші жарты жылдықты қорытындылауға арналған алқа отырысында басқарма басшысы Қамалжан Надыров атқарылған жұмыстар жайына есеп берді.
Денсаулық сақтау саласын цифрландыру Кеңестің өзекті мәселелердің бірі ретінде қаралды. Басқарма басшысының мәліметі бойынша бүгінде барлық медициналық ұйым 100 пайыз интернет желісіне қол жеткізген.
Барлық ведомстволық медициналық ұйымдарда медициналық ақпараттық жүйелер орнатылған. Барлық персонал – бұл 8 мыңнан астам адам компьютерлік сауаттылыққа және медициналық ақпараттық жүйелер жұмысына оқытылды, – деді Қамалжан Надыров.
Құжаттарды цифрландыру нәтижесінде 780 мыңнан астам медициналық құжат электрондық форматқа ауыстырылып, осылайша астаналықтардың 93 пайызы электрондық денсаулық паспортын алды.
Қаламызда бала туу көрсеткіші де жоғарылап келеді. Осы жарты жылдықта 13 974 сәби дүниеге келген, өткен жылдың осы мерзімімен салыстырғанда туу көрсеткіші 360 сәбиге артқан. Осы аралықта 60 мың сырқат жан тегін дәрі-дәрмекпен қамтылып, өткен жылдың осы мезгілімен салыстырғанда 10 мың жанға артқан.
Елорда медицина саласының кемшін тұстары да жетерлік. Мемлекеттік бағдарламаның 36 көрсеткішінен ана өлімі, қатерлі ісікпен сырқат жанның бес жылдық өмір ұзақтығы, қатерлі ісіктен өлім-жітім, туберкулезден өлім-жітім бойынша көрсеткіштері төмен.
Отырыс соңында Астана қаласы әкімінің орынбасары Ермек Аманшаев елордалық емханалар мен ауруханалар бойынша айтылған ескертулерді жою бойынша бірқатар нақты шаралар қабылдауды ұсынды.
