ЖАСЫЛ БЕЛДЕУ ЖАНҒА САЯ
Елордада Қазақстан халқы Ассамблеясының «Астананың жасыл белдеуі» атты экологиялық шарасы болып өтті.
Айтулы шараның мақсаты – Астананың жасыл белдеуінің рекреациялық әлеуетін дәріптеу, өскелең ұрпақтың бойына Қазақстанның табиғи байлықтарына ұқыпты қарауға дағдысын сіңіру, салауатты өмір салтын насихаттау.
Шараға қатысушылар алдында сөйлеген сөзінде ҚХА төрағасының орынбасары – хатшылық меңгерушісі Дархан Мыңбай елордамыздың күн сайын көркейіп келе жатқанын, осы маңызды істе Елбасымыздың «Жасыл белдеу» бастамасы өте құнды болып табылатынына тоқталды. «Мемлекет басшысы айтқандай: «Астананың жасыл белдеуі, бұл орман біздің таза ауамен дем алуға мүмкіндік беретін еліміздің тыныс органы – «өкпесі». Біздің ұрпағымыз үшін жасалып отырған сый, мәңгілік мұра» деді ол.
Расымен де, бұл кейінгі ұрпақ үшін үлкен мұра. Осындай қолдан егілген орман ТМД елдерінің ешқайсысында жоқ. Бұл – бірегей қазақстандық жоба. Қазір Астана маңын 80 мың гектардан астам аймағын орман құрайды. Болашақта оны Бурабай орманына ұластыру көзделген.Ауыл шаруашылығы вице-министрі Ерлан Нысанбаев «жасыл белдеудің» пайда болу тарихы туралы, бұл өңірде орман шаруашылығын жүргізу ерекшелігі жайында, сондай-ақ, жасыл желектерді сақтау және аумағын кеңейту бойынша жүргізіліп жатқан жұмыстар туралы егжей-тегжейлі әңгімелеп берді.
Шараға ҚР Парламенті Мәжілісі төрағасының орынбасары Владимир Божко бастаған Мәжіліс депутаттары, мемлекеттік мекемелер мен этномәдени бірлестік өкілдері және қала жастары қатысып, «Жасыл белдеуді қалпына келтіру және жасыл белдеудің екінші кезегін жасау» жобасына сәйкес көшеттер отырғызды.
Азамат Құсайын