1000 орын ұсынылды
Елордадағы Жастар сарайында әкімдіктің Халықты жұмыспен қамту орталығы жәрмеңке ұйымдастырып, 1000-ға жуық бос жұмыс орнын ұсынды. Одан бөлек, «Ашық мемлекет» мемлекеттік қызметтердің жәрмеңкесі өткізілді. Онда келушілерге электронды цифрлы қолтаңба беріліп, өзге де құжаттар мен анықтамаларды алудың жолдары түсіндірілді.
Биыл жыл басынан бері Жұмыспен қамту орталығына 7 мыңнан астам адам өтініш қалдырған екен. Орталықтың мәліметіне сүйенсек, оның 2652-сі жұмысқа орналастырылды. Ал бүгінгі жәрмеңкеде 100 шақты жұмыс берушілер үміткерлермен тікелей тілдесіп, сұхбаттасты. Жұмыспен қамту орталықтарының мамандары еңбекпен қамту, жұмысқа орналасу, қайта даярлау, жұмыс іздеу технологиясы, кәсіптік оқыту және қосымша кәсіби білім беру мүмкіндіктері туралы кеңес берді.
Жұмыспен қамту орталығының жұмыс берушілерді қолдау бөлімінің басшысы Қаламқас Кульшиманова биыл елордада тағы 4 жәрмеңке ұйымдастыру көзделген дейді. Оның айтуынша, аталмыш шараға жұмыс берушілердің өздері де зор ықылас танытып отыр. Себебі жәрмеңке – мекемелер үшін мамандарды сұрыптап, таңдап алуға таптырмас мүмкіндік.
Ал «Ашық мемлекет» жәрмеңкесінде мемлекеттік органдар тұрғындарға онлайн қызметтерді қалай алуға болатынын түсіндірді. Мәселен, Әділет департаменті құжаттарға апостиль қою тәртібімен таныстырды. ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Астана қаласы бойынша департаменті басшысының орынбасары Роман Ким бұл шара Елбасы жариялаған «Цифрлы Қазақстан» бағдарламасын жүзеге асыруға бағытталғанын жеткізді.