Әлеуметтік желінің полицейге көмегі көп
Әлеуметтік желіні қолданушылар жол жүру ережесін бұзған оқиғаларды жеке парақшаларына қойып, фотосымен жариялап жатады. Енді Астана қалалық ІІД Әкімшілік полиция басқармасы әлеуметтік желіде жазылған жайттарды да ескерусіз қалдырмауға бел байлап отыр.
Қазірдің өзінде әлеуметтік желі қолданушыларының көмегімен астаналық жол сақшылары жолдың қарама-қарсы бетіне шығып кеткен 4 жүргізушіні әкімшілік жауапкершілікке тартқан.
Сондықтан, Әкімшілік полиция басқармасының ерекше тапсырмалар жөніндегі аға инспекторы Лариса Красникова жолдағы заң бұзушылыққа бей-жай қарамай, полицейлерге жәрдемдескен әлеуметтік желі қолданушыларына алғысын айта отырып, қандай да бір құқық бұзушылықтың куәгерлерін бейқам қалмай,«102» телефонына немесе Астана қаласы Ішкі істер департаментінің mvd.gov.kz порталына хабарласуға шақырады.