پرەزيدەنتتىڭ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىن ۇجىممەن تىڭدادىق. 22 جىلدىق تاجىريبەسى بار ۇستاز رەتىندە ءبىلىم بەرۋ سالاسىنداعى جاستار تاربيەسى, ساپالى بىلىممەن قارۋلانعان سانالى ۇرپاق دايارلاۋ ماسەلەسى مەنى دە بەي-جاي قالدىرمادى.
مەملەكەت باسشىسى قاسىم-جومارت توقاەۆتىڭ بۇل جولعى جولداۋىندا ايقىندالعان ماڭىزدى ستراتەگيالىق مىندەتتەر مەن تەرەڭ ماعىنالى قۇندىلىقتار قاتارىنا كوپتەگەن وزەكتى جانە ماڭىزدى دۇنيە ەندى. ۇلت ۇستازى احمەت بايتۇرسىنۇلىنىڭ «ءبىز اۋەلى ەلدى تۇزەتۋدى بالا وقىتۋ ءىسىن تۇزەتۋدەن باستاۋىمىز كەرەك» دەگەن ءسوزىن باسشىلىققا الا وتىرىپ, ادىلەتتى قازاقستان قۇرامىز دەسەك, ساياسي-ەكونوميكالىق رەفورما جاساۋ جەتكىلىكسىز, ەڭ باستىسى, قوعامدىق سانا, ازاماتتاردىڭ نيەتى وزگەرۋى كەرەك. جاڭا قازاقستاننىڭ جاڭا تۇرپاتتى جاستارىن وتانشىل, ءبىلىمپاز, ەڭبەكقور, ءتارتىپتى, ادال, ءادىل ەتىپ تاربيەلەسەك, ەلىمىز ءوزىنىڭ ماقسات-مۇراتىنا قول جەتكىزەتىنى ءسوزسىز. ابايدىڭ «تولىق ادام» ءىلىمىن نەگىزگە الا وتىرىپ, جاستاردى ادالدىق جوق جەردە ەشقاشان ادىلدىك بولمايتىنىنا تاربيەلەۋ, ادىلەتتى قازاقستان قاعيداتىن قاپەردە ۇستاۋ كەرەكتىگى تۋرالى جولداۋداعى مىندەتتەر ءبىلىم سالاسىنىڭ وكىلدەرىنە زور جاۋاپكەرشىلىك جۇكتەيدى.
بالا تاربيەلەۋدەگى بارشا ۇستازدار قاۋىمىنىڭ باستى ماقساتى – ۇزدىكسىز ءبىلىم بەرۋ جۇيەسىندە, ياعني بالاباقشادان باستاپ جوعارى وقۋ ورنىنا دەيىن بەرىلەتىن ساپالى ءبىلىم مەن تاعىلىمدى تاربيەدە ادال ازامات قالىپتاستىرۋ. بۇل رەتتە پرەزيدەنتىمىز «ادىلەتتى قازاقستان» مەن «ادال ازامات» سياقتى ۇعىمداردىڭ قوعامىمىزدا باسىمدىق تانىتۋى ءتيىس ەكەنىن ايتا كەلە, جاستار اراسىنداعى كرەاتيۆتىلىك, موبيلدىلىك, اشىق سۇحباتقا دايىندىق سياقتى قاسيەتتەردىڭ كەڭىنەن تارالۋىنا نازار اۋداردى.
جولداۋدا قوزعالعان ماڭىزدى ماسەلە – ءبىلىم بەرۋ جۇيەسىن رەفورمالاۋ, ونىڭ ىشىندە ساپالى ءبىلىم الۋ, سونداي-اق قاۋىپسىز بالالىق شاقتى قامتاماسىز ەتۋ. ءبىلىم الۋداعى تەڭدىكتى قامتاماسىز ەتۋ ماقساتىندا قاسىم-جومارت كەمەلۇلى بەس جاستان اسقان بالالارعا ارنالعان «كەلەشەك» اتتى بىرىڭعاي ەرىكتى جيناقتاۋ جۇيەسىن ەنگىزۋدى تاپسىردى. بۇل باعدارلامادا مەملەكەت تاراپىنان ۇسىنىلاتىن باستاپقى ءبىلىم بەرۋ كاپيتالى, جىل سايىنعى مەملەكەتتىك سىياقى جانە ينۆەستيتسيالىق تابىس قاراستىرىلۋعا ءتيىس. وسى جيناق پەن «ۇلتتىق قور – بالالارعا» جوباسىنىڭ قاراجاتى قوسىلعاندا, جاس ۇرپاقتىڭ ساپالى ءبىلىم الۋىنا مۇمكىندىك تۋادى.
ادال ازامات جانە تۇعىرلى تۇلعا بولۋدىڭ نەگىزى بالا كەزدەن قالىپتاسادى. سوندىقتان ءبىز جاس ۇرپاقتىڭ قاۋىپسىز ءارى الاڭسىز ءومىر ءسۇرۋى ءۇشىن قولدان كەلگەننىڭ ءبارىن جاسايمىز. كامەلەتكە تولماعاندارعا قاتىستى زورلىق-زومبىلىقتىڭ كەز كەلگەن تۇرىنە جازا قاتاڭداسا, ونىڭ ىشىندە ءبىلىم بەرۋ مەكەمەلەرىندە پسيحولوگيالىق قولداۋ قىزمەتى كۇشەيسە, بىرىڭعاي سەنىم تەلەفونى ۇيىمداستىرىلىپ, زورلىق-زومبىلىق پەن قورقىتۋ قۇرباندارىنا كومەك كورسەتۋدىڭ ناقتى باعدارلاماسى ازىرلەنسە, بۇگىنگى بۋىننىڭ بولاشاعىنا ءدال قازىرگىدەي الاڭداماعان بولار ەدىك. ءبىز مادەنيەتتى, ءبىلىمدى, عىلىمدى دامىتۋ ارقىلى قازىرگى اشىق الەمنىڭ ءبىر بولشەگى بولۋعا ۇمتىلۋدامىز. بۇل ماقساتقا جەتۋ جولىندا ءبىر قولدان جەڭ, ءبىر جاعادان باس شىعارىپ, بىرىكسەك قانا ناتيجەگە قول جەتكىزەمىز. ەرتەڭگە دەگەن ءۇمىت پەن سەنىم ۇيالاتاتىن بۇل جولداۋ ەلىمىزدى جاڭا بەلەسكە جەتەلەيدى دەپ ويلايمىن.
نۇرگۇل اقبانوۆا,
ج.جاباەۆ اتىنداعى №4 مەكتەپ-گيمنازيا مۇعالىمى
