استانا قالاسىنداعى №8 مەكتەپ-ليتسەيدە قۇندىلىققا نەگىزدەلگەن ءبىلىم بەرۋ جوباسىنىڭ جۇزەگە اسىرىلۋ بارىسىمەن تانىستىرۋ جانە تاجىريبە بولىسۋگە باعىتتالعان «قۇندىلىققا تولى مەكتەبىم!» اتتى سەمينار ۇيىمداستىرىلدى.
استانا قالاسى ءبىلىم باسقارماسىنىڭ قولداۋىمەن ۇيىمداستىرىلعان مازمۇندى دا ماعىنالى ءىس-شاراعا ەلورداداعى ورتا ءبىلىم بەرۋ مەكتەپتەرىنىڭ ديرەكتورلارى, تاربيە ءىسى جونىندەگى مەڭگەرۋشىلەر شاقىرىلدى. مەكتەپ ۇجىمى سەمينار قوناقتارىن مەكتەپ الاڭىندا قۇرىلعان ادەمى كيىز ۇيدە قارسى الىپ, ولاردىڭ نازارىنا وقۋشىلاردىڭ قولونەر تۋىندىلارى ۇسىنىلدى.
سەميناردى اشقان №8 مەكتەپ-ليتسەيدىڭ ديرەكتورى گۇلنۇر ايتيموۆا مەكتەپتەگى قۇندىلىققا نەگىزدەلگەن ءبىلىم بەرۋ جوباسىنىڭ قالاي جۇزەگە اسىرىلىپ جاتقانىن, ونىڭ وقۋشىلارعا بەرەتىن ونەگەسى, سونداي-اق مۇعالىمدەردىڭ قولدانىپ جۇرگەن جاڭاشىل يدەيالارى جايىندا بايانداپ بەردى. وقۋ ورنىندا جۇرگىزىلگەن ەركىن ساۋالنامانىڭ ناتيجەسىندە وقۋشىلاردىڭ قۇندىلىقتارعا دەگەن كوزقاراسى زەردەلەنىپ, وقۋشى, مۇعالىم جانە اتا-انا اراسىنداعى بايلانىستى نىعايتۋدىڭ جولدارى ايقىندالعان. سونىڭ ناتيجەسىندە بۇگىنگى تاڭدا مەكتەپتىڭ ومىرىنە اتا-انالاردىڭ بەلسەندى ارالاسۋى ارتقان.
جوبا جايىندا مەكتەپ ديرەكتورى گۇلنۇر ايتيموۆا مەكتەپتەگى وقۋشى تەك قانا بەلگىلى ءپاننىڭ شەڭبەرىندە قالىپ قويماي, سول ءپاننىڭ باعىت-باعدارىنا قاراي ادامگەرشىلىك, رۋحاني قۇندىلىقتاردى دا بويىنا ءسىڭىرۋى قاجەت دەگەن پايىمىن ايتادى. وسى ورايدا مەكتەپ قابىرعاسىندا جۇرگىزىلەتىن ءىس-شارالاردىڭ بارىندە جالپى قۇندىلىقتارعا ماڭىز بەرىلەتىنى بايقالادى.
سەمينار بارىسىندا ءبىلىم بەرۋ مەكەمەلەرىنىڭ باسشىلارى №8 مەكتەپ-ليتسەيدىڭ جاس مۇعالىمدەرى وتكىزگەن شەبەرلىك ساباقتارىنا قاتىستى. بۇل رەتتە دەبات, STEAM, قازاقستان تاريحى, فيزيكا, ماتەماتيكا, حيميا, جاراتىلىستانۋ, كوركەمسۋرەت, اسىق اتۋ ويىنى ساباقتارى ۇيىمداستىرىلدى. وقۋ ورنىنداعى «جاسىل مەكتەپتىڭ» مەڭگەرۋشىسى مارجان مۇراتبەكقىزى وتكىزگەن ساباقتا وقۋشىلاردىڭ تابيعاتتى ايالاۋعا قۇشتارلىعى, ەڭبەككە قىزىعۋشىلىعى اڭعارىلدى. QTalks ساباعىندا وقۋشىلاردىڭ وي-ءورىسىنىڭ جان-جاقتى ەكەنىنە كوز جەتكىزدىك.
سەمينارعا قاتىسۋشىلارعا مەكتەپ وقۋشىلارى ساحنالاعان تەاترلاندىرىلعان قويىلىمدار دا ۇنادى. ەڭ باستىسى, مەكتەپ-ليتسەيدە ءبىلىم بەرۋدىڭ قۇندىلىقتارعا نەگىزدەلىپ وتكىزىلەتىنى بايقالادى. ياعني ءبىلىم مەن رۋحاني تاربيەنىڭ ۇشتاسىپ, وسكەلەڭ ۇرپاقتىڭ تولىققاندى دامۋىنا جول اشىلعان. مۇنداي جوبانى بارلىق مەكتەپتەردە پايدالانا بىلسە, ارينە, نۇر ۇستىنە نۇر بولارى ءسوزسىز.
