«بايتەرەك» توبى: ميۋزيكل انشىلىگىمىز بەن اكتەرلىگىمىزدى جاراستىرىپ جىبەردى

– توپتىڭ ون جىلدىق مەرەيتويى قارساڭىندا قويىلعان «قوزى كورپەش-بايان سۇلۋ» ميۋزيكلىن تاماشالادىم. كلاسسيكالىق تۋىندى زاماناۋي تۇردە ۇسىنىلعانى ۇنادى. باستى رولدەردى  شىنايى بەينەلەپ, كورەرمەن جۇرەگىنە جەتكىزدىڭىزدەر دەپ ويلايمىن. بىراق, ون جىلدىقتا ساعىنا كۇتكەن «بايتەرەكتىڭ» اندەرىن نەگە ەستىمەدىك؟ شىعارماشىلىق كونتسەرت قويۋ ويلارىڭىزدا بار ما؟

گۇلجانات وسپانوۆا, قالا تۇرعىنى.

«بايتەرەك» توبى:

– ەڭ الدىمەن, گۇلجانات, سىزگە راحمەت! حالىق ۇنادى دەپ باعاسىن بەرىپ جاتسا, ءبىز مۇنى ونەرىمىزدىڭ جەتىستىگى  دەپ ەسەپتەيمىز.  «ميۋزيكلدان سوڭ, اندەرىڭىز جوق قوي» دەپ, ءانىمىزدى دە سۇراپ جاتتى. ميۋزيكلدا شىرقاعان اندەرىمىز ءبىزدىڭ رەپەرتۋارعا كىردى. سونىمەن قاتار, ءۇشىنشى كۇيتاباقتى جانە ەكى بەينەبايان جازۋ ۇستىندەمىز. قالا كۇنىنە دەيىن ولاردى دا اياقتاپ, تىڭدارمان نازارىنا ۇسىناتىن بولامىز.  ۇشەۋىمىز دە اكتەر بولعاننان كەيىن توبىمىز قۇرىلعان  كەزدەگى ورتاق ارمان – انشىلىگىمىز بەن اكتەرلىك ويىنىمىزدى ءبىر ارناعا ۇشتاستىرىپ, حالىققا وسىنداي ميۋزيكل ۇسىنۋ بولدى. ون جىلدان كەيىن بۇل ارمانىمىز دا ورىندالدى.

– ەرلان اعا, ءبىر سۇحباتىڭىزدا «ينتەرنەتتى كوپ پايدالانا بەرمەيمىز, ءبىز جايلى تىڭدارمان پىكىرىن دوستارىمىزدان ەستىپ جاتامىز» دەپسىز. ال, قازىر عالامتوردا قانشالىقتى ءجيى وتىراسىزدار؟ ونداعى سىرت كوزگە ءمان بەرەسىزدەر مە؟

ارايلىم

– جاڭالىقتىڭ ءبارى عالامتوردا عوي. الەۋمەتتىك جەلىلەردىڭ بارلىعىندا دەرلىك وتىرامىز. «تwitter», «Facebook», «Instagram», «موي مير» سياقتى الەۋمەتتىك جەلىلەردە تىركەلگەنبىز. سوعان ۋاقىت ءبولىپ, تىڭدارمان حاتتارىنا جاۋاپ بەرەمىز, پىكىرلەردى وقىپ, العىسىمىزدى ايتامىز. تىڭدارمان پىكىرى ءبىز ءۇشىن وتە ماڭىزدى.

– مەن كىشكەنتايىمنان ءان ايتامىن. بىرەۋلەر مەنەن «ۆوكالعا قاتىستىڭ با؟» دەپ سۇراپ جاتادى. ۆوكالعا قاتىسۋ سونشا مىندەتتى مە؟ سىزدەر ۆوكالدان ساباق بەرىپ, شاكىرت تاربيەلەيسىزدەر مە؟

باتىرجان, وقۋشى

سايلاۋ قاميەۆ:

– سپورتشىلار ءوز دەنەسىن قالىپتا ۇستاپ, جەتىستىككە جەتۋ ءۇشىن قالاي جاتتىقسا, ءانشى دە ءوز داۋىسىن جاتتىقتىرىپ ۆوكالمەن اينالىسۋ كەرەك. ۆوكال ءان ايتۋ مانەرىن قالىپتاستىرىپ, ءوز باعىتىڭدى تاڭداۋ ءۇشىن قاجەت. ءبىز ۆوكالدان ساباق بەر­مەيمىز, بىراق مەن قازاق ۇلتتىق ونەر ۋنيۆەرسيتەتىندە اكتەرلىك شەبەرلىك پانىنەن ءدارىس وقيمىن, پراكتيكانى دا جۇرگىزەمىن. بۇل وقۋشىلارعا ەمەس, باكالاۆرلارعا ارنالعان ءدارىس. بىراق, باتىرجان, داۋىسىڭدى تاربيەلەيمىن دەسەڭ, ۆوكالعا قاتىسقانىڭ ءجون.

– قالالىق اۆتوبۋسقا سوڭعى رەت قاشان مىندىڭىزدەر جانە قالتادا ءبىر تيىن جوق كەزدە «زايچيك» بولىپ, بيلەت تولەمەگەن كەزدەرىڭىز بولدى ما؟

ماقسۇت

ەرلان مالاەۆ:

– ماسساعان, ونداي كەزدەر كوپ بولعان! ستۋدەنت كەزىمىزدە وتىرعان تاكسي جۇرگىزۋشىسىنەن دە, كوندۋكتورلاردان دا قاشقان تالاي قىزىق ساتتەر ءالى ەسىمدە. سوڭعى رەت قىتايداعى اۆتوبۋسقا ءمىندىم. تاكسي كەپتەلىستە كوپ تۇرىپ قالادى ەكەن, ال اۆتوبۋستىڭ ارنايى جولدارى بار, ول جولدا اۆتوبۋستان باسقا كولىك جۇرمەگەندىكتەن, جول اشىق, دىتتەگەن جەرىڭە ۋاقىتىندا جەتەدى ەكەنسىڭ.

–ءانشى حالىق الدىندا جاندى داۋىستا ءان شىرقاۋى ءتيىس دەپ جاتامىز. كەيبىرەۋى ءتۇرلى نارسەنى سىلتاۋ ەتىپ, فونوگراممامەن ايتقان دۇرىس, دىبىس تازا شىعادى دەپ جاۋاپ بەرىپ جاتادى. سىزدەر قانداي پىكىردەسىزدەر؟ فونوگراممانىڭ كومەگىنە كوپ سۇيەنەسىزدەر مە؟

تاڭشولپان, ستۋدەنت

سايلاۋ كاميەۆ:

– 50 دە 50%  ارا-قاتىناسىن ۇستانامىن. قاي كەزدە فونوگراممامەن ايتۋ كەرەكتىگىن ءبىلۋ قاجەت. كورشى ەلدەردە فونوگرامما تۋرالى زاڭ قابىلداندى. سونداي زاڭ بىزگە دە كەرەك. كونتسەرت فونوگراممامەن ايتىلسا, حالىققا الدىن الا ەسكەرتىلىپ, ونداي كونتسەرتتىڭ بيلەت قۇنىن ارزانداتۋ كەرەك

– سايلاۋ اعا, ءسىزدى رەجيسەرلىك قىرىڭىزدان دا تانيمىن. «قىز جىبەك» سپەكتاكىلىن, جاقىندا «قوزى كورپەش – بايان سۇلۋ» ميۋزيكلىن ساحنالادىڭىز. وسى ميۋزيكلدى قازاقستاننىڭ باسقا دا قالالارىندا قوياسىزدار ما؟ بولاشاقتا كورەرمەندەردى تاعى قانداي تۋىندىلارمەن قۋانتپاقسىز?

ارمانگۇل, ستۋدەنت

– ءيا, مەن رەجيسسەرلىككە بەت بۇردىم. بۇل سالاداعى العاشقى ەڭبەكتەرىم كلاسسيكالىق شىعارمالاردى ساحنالاۋدان باستالدى. جاسى ۇلكەن اعا-اپالارىمىزدان ورىندى سىندى دا ەستىدىم, كوكەيگە ءتۇيدىم. رەجيسسەرلىككە جاڭادان اياق باسقاندىقتان, ۇيرەنەرىم دە, جۇزەگە اسىرام دەگەن يدەيا دا كوپ. كەيدە وزگەدەن دە ەمەس, ءوز-وزىڭنەن دە قىزعاناتىن دۇنيەلەر بولادى شىعارماشىلىق ادامىندا. مەن قازىر كەلەسى تۋىندى جايلى ۇلكەن تولعانىس ۇستىندە ءجۇرمىن. زاماناۋي دراماتۋرگيا قىزىقتىرادى. جوسپارىمداعى قويىلىمعا قاتىساتىن اكتەرلەردى دە ويلاستىردىم. جاقىن ارادا بەلگىلى بولادى.

– وتاعاسى بولۋ ۇلكەن جاۋاپكەرشىلىك قوي.  اكە رەتىندە بالا تاربيەسىنە قالاي اتسالىساسىزدار؟

نازگۇل,  كوپبالالى انا

ەرلان مالاەۆ:

– بالانىڭ ساباعىنا كوڭىل ءبولىپ, قاي پاننەن اقساپ جاتىر, قايسىسىنا قوسىمشا ساباق كەرەك ەكەنىن ۇنەمى باقىلاپ, ءاردايىم اكەلىك اقىل-كەڭەستەرىمدى ايتىپ وتىرامىن.

نۇركەن وتەۋىلوۆ:

– ءبىزدىڭ بولاشاعىمىز – قازىرگى ۇرپاق. بالامەن سىرلاسىپ, اڭگىمەلەسۋگە ءاردايىم ۋاقىتىمدى بولەمىن. بىرگە سەرۋەندەيمىن, اقىلىمدى ايتامىن, «كورسىن, ءبىلسىن» دەپ وسىنداي ونەر وردالارىنا ءجيى اپارىپ تۇرامىن.

سايلاۋ قاميەۆ:

– قانداي اكە ەكەنىمدى بىلمەيمىن. ونى كەلىنشەگىمنەن سۇراۋ كەرەك شىعار. ءار ەر ادام دۇنيەگە ءسابيى كەلگەندە جاقسى اكە بولعىسى كەلەدى عوي, ارينە. قىزى بار اكەلەردىڭ سەزىمى قانداي بولارىن بىلمەيمىن, قىزىم جوق. قازىردە 3 ۇلدىڭ اكەسىمىن. جالپى, ءوزىمنىڭ مىنەزىم دە ۇل بالانى تاربيەلەۋگە كەلەتىن سياقتى. اللا نيەتىمە قاراي بەرگەن عوي 3 ۇلىمدى. «اكە-شەشەنىڭ قادىرىن بالالى بولعاندا بىلەرسىڭ» دەگەن ماقال بار ەدى عوي. جاتساق تا, تۇرساق تا بالانى, ولاردىڭ بولاشاعىن ويلايمىز. ولارمەن قۇرداسىمداي سويلەسەمىن.

–بۇگىنگى ەسترادانىڭ ءسىز بىلەتىن كەمشىلىكتەرى قانداي جانە بارلىق ەسترادا بيلىگى ءسىزدىڭ قولىڭىزدا بولسا, ول كەمشىلىكتەردى قالاي وزگەرتەر ەدىڭىزدەر؟

جاسۇلان, اسابا.

 ەرلان مالاەۆ:

– انشىلەرگە كوپ سالماق ءتۇسىپ جاتادى: ءاندى وزدەرى جازادى, بەينەباياندى وزدەرى تۇسىرەدى, ول جازعاندارىن روتاتسياعا بەرە الماي قينالىپ جاتادى. ويتكەنى, قايدا بارساڭ دا, كوپ قاراجاتتى تالاپ ەتەدى. دەمەۋشىلەرى جوق. ءانشى – ءانشى عانا ەمەس, ءانشى وزىنە اديمينيستراتور ءارى پروديۋسەر. ءبىر ادام جالعىز ءوزى جۇمىس جاساي المايدى. ءتىپتى, كونتسەرت قويۋعا كەلگەندە, عيماراتتى جالعا الۋدىڭ ءوزى قىمبات. وسىلارعا جەڭىلدىك بولۋ كەرەك, مەنىڭشە.

سايلاۋ قاميەۆ:

– توي-دومالاقتاردان ارى اسا الماي, تەك قازاعىمىزعا عانا قولتاڭبا بەرىپ, الەمدىك دەڭگەيگە كوتەرىلمەۋىمىزدى ەسترادا ونەرىندەگى ۇلكەن كەمشىلىك دەپ بىلەمىن. ەسترادامىزدا تالانتتى جاستار كوپ. جاقسى جۇمىس جاساپ, تالپىنىپ جاتقان ساۋساقپەن سانارلىقتاي عانا پرو­ديۋسەرلەرىمىز بار. بىراق  حالىقارا­لىق بايقاۋلاردا ۇنەمى 3,7,8, 9-شى ورىنداردان كورىنەدى ولار. نەگە؟ بارلىق پروديۋسەرلەردىڭ ويىن ورتاعا سالىپ, وسى ماسەلە جايىندا تالقىلايتىن ءبىر ۇلكەن وداق قۇرىلۋ كەرەك تە شىعار.  جاقسى يدەياسى بار پروديۋسەرلەردىڭ جۇمىسى مەملەكەت تاراپىنان قولداۋ تاۋىپ, ولاردىڭ سەنىمدى جوبالارىنا قارجى ءبولىنىپ, ەسترادامىزدى حالىقارالىق دەڭگەيگە كوتەرۋ كەرەك.

–تانىمال بولعاننان كەيىن كەيدە جەكە ءومىرىڭىز قوعامدىق تالقىلاۋعا  اينالىپ كەتىپ جاتاتىن شىعار. اتاق-داڭقتان باس تارتىپ, تىنىشتىقتى اڭساعان كەزدەرىڭىز بولدى ما؟

عازيز

نۇركەن وتەۋىلوۆ:

– اللانىڭ بەرگەن نەسىبەسىنەن باس  تارتىپ, ىسىراپ جاساعان ەمەسپىن. حالىقتىڭ ىستىق ىقىلاسى, جارقىن پەيىلى جۇمىس ىستەۋىمىزگە ارقاشان دا كۇش بەرىپ, العا جەتەلەپ وتىرادى.

ەرلان مالاەۆ:

– تانىمالدىلىقتىڭ جاقسىلىعى كوپ قوي. قاي جەردە بولساڭ دا, حالىق قۇرمەتتەيدى, مەرەيىڭدى ءوسىرىپ, سىي-قۇرمەتىن ايامايدى, قاريالار اق باتاسىن بەرەدى. قۇدايعا شۇكىر, ەش زيانىن كورگەن ەمەسپىن. بىراق ادام بولعان سوڭ كەيدە تىنىشتىقتى اڭساپ, بارلىق تىرلىكتەن 10-15 كۇنگە بوساپ, بوي جازىپ, وي سەرگىتىپ تىنىققىم كەلەتىنى جاسىرىن ەمەس.

دايىنداعان

مادينا قايراتقىزى