شاكەن ايمانوۆ اتىنداعى «قازاقفيلم» اق ءباسپاسوز قىزمەتىنىڭ وسى اپتادا تاراتقان مالىمەتى بويىنشا, اقان ساتاەۆتىڭ «جاۋجۇرەك مىڭ بالا» ءفيلمىنىڭ العاشقى كورسەتىلىمىنەن تۇسكەن قارجى وتاندىق كينو وندىرىسىندەگى رەكوردتىق دەڭگەيدى باعىندىردى. ناقتىراق ايتساق, العاشقى ءۇش كۇننىڭ وزىندە فيلم ميلليون دوللارعا جۋىق قارجى جيناعان. جارناماسى ءجۇرىپ تۇرعان جاڭا كينو جايلى سالا ماماندارى نە دەيدى؟ سونىمەن,
كينونى كىم كالاي باعالادى؟
باۋىرجان نوگەربەك,
كينوتانۋشى:
ەڭ ۇلكەن جەتىستىگى – رەجيسسەر تاريحي ەكشن جانرىن كەرەمەت الىپ شىققان. بۇدان بۇرىنعى «كوشپەندىلەر» ءفيلمى دە وسى تالاپپەن تۇسىرىلگەن بولاتىن. بىراق, شىنى كەرەك, ۇدەسىنەن شىعا المادى. كينوعا قاتىستى «قازاقتىڭ تاريحى, تاريحي تۇلعالارى دۇرىس قامتىلمادى» دەگەن سىن-ەسكەرتپەلەر ايتىلدى كەزىندە.
بۇل فيلمدە تاريحي تۇلعالارىمىز ەكىنشى پلاندا. دەسە دە, فيلمگە ارقاۋ بولعان جاس باتىرلاردىڭ ەرلىگى جونىندەگى نەگىزگى وقيعا وتە نانىمدى, قىزعىلىقتى ەتىپ كورسەتىلگەن. اكتەرلەردىڭ ويىنى كەرەمەت. مونتاجدالۋى ودان دا كەرەمەت. تانىمال اكتەرلەرمەن بىرگە جاس تالانتتاردىڭ تاڭدالۋى وتە قۇپتارلىق. كوستيۋمدەرى دە وتە جاقسى تاڭدالىپتى.
ءبىر عانا اتتەگەن-ايى, كينوعا نۇرعيسا اعامىزداي كومپوزيتور جەتىسپەي تۇر. كەزىندە «قىز جىبەكتىڭ» مۋزىكاسىن قانداي ەتىپ جازىپ ەدى ول كىسى.
سوسىن, ءفيلمنىڭ ءبىر-ەكى تۇسىندا تانىمال تۇلعالاردىڭ كورىنىپ قالۋى مەنىڭشە, دۇرىس شەشىم ەمەس. باسىندا جانە سوڭىندا بەرىلەتىن تيترلەر دە قاجەت ەمەس ەدى. كورەرمەندى ءفيلمنىڭ اتموسفەراسىنان شىعارىپ جىبەرەدى. ماعان مۇنىڭ ءبارى جالعان جارناما سەكىلدى كورىندى. جالپى, جاقسى فيلم.
ەرمەك امانشاەۆ,
ش.ايمانوۆ اتىنداعى
«قازاقفيلم» اق پرەزيدەنتى:
جوڭعار-قازاق سوعىسىنان وزگە تاقىرىپ جوق پا دەيتىندەر تابىلىپ جاتىر. الايدا, كەز كەلگەن ۇلتتىڭ تاعدىرىندا شەشۋشى وقيعالار, كەزەڭدەر بولادى. وسى تۇرعىدا قازاق-جوڭعار سوعىسىن اتتاپ ءوتۋ مۇمكىن ەمەس
اقان – بۇگىندە الدىڭعى قاتارلى رەجيسسەرلەرىمىزدىڭ ءبىرى. بۇعان دەيىنگى تاريحي تاقىرىپتا فيلم تۇسىرگەن رەجيسسەرلەردىڭ جەتە الماعان بيىگىنە اقان جەتكەن سەكىلدى. «جاۋجۇرەك مىڭ بالا» بۇعان دەيىنگى كارتينالار كوتەرە الماعان جۇكتى ارقالاۋعا تىرىستى.
ءبىزدى قۋانتقانى – «جاۋجۇرەك مىڭ بالا» فيلمىندە 99 پايىز ءوز ەلىمىزدىڭ ماماندارى, اكتەرلەرى جۇمىس جاسادى. ناتيجەسىندە, قازاق كينوسىنا جاڭا ەسىمدەر قوسىلدى. باستى رولدەردى ويناعان جاستار اسىلحان تولەپوۆ, ايان وتەپبەرگەن, قۇرالاي اناربەكوۆالار اعا بۋىن اكتەرلەردەن كەم ويناعان جوق. بۇلار – قازاق كينوسىنىڭ بولاشاق جۇلدىزدارى.
فيلم مامىردىڭ ورتاسىندا كانن فەستيۆالى اياسىندا كورسەتىلەدى. وعان 30-دان استام ەلدىڭ ديستريبيۋتەرلەرى جينالىپ جاتىر. الداعى 1-2 ايدا الەمدىك ەكرانعا شىعارىپ, تاجىريبەلى ديستريبيۋتەرلەرمەن كەزدەسەمىز.
