قازىرگى كەزدە جەڭىلدىكتى جانە وقۋشىلارعا ارنالعان كولىك كارتالارى تەگىن تاراتىلىپ جاتىر. 30 شىلدەدە Astra Plat ەلەكتروندى جۇيەسىن ىسكە قوسۋ جوسپارلانعان.
«استانا LRT» جشس تولەم جۇيەلەرى ورتالىعىنىڭ مالىمەتىنشە, بۇگىندە 44 مىڭنان ارتىق جەڭىلدىكتى جانە 68 مىڭنان استام وقۋشىلارعا ارنالعان كولىك كارتاسى بەرىلدى. ەلەكتروندى جولاقى تولەۋ جۇيەسى ەنگىزىلەتىن كەزەڭدە 1 ماۋسىم – 31 تامىز ارالىعىندا 7-دەن 15 جاسقا دەيىنگى بالالار قالالىق جانە ەكسپرەسس-مارشرۋتتاردا تەگىن جول جۇرەدى. بۇل ءۇشىن ءار بالا اۆتوبۋستا اتاۋلى كولىك كارتاسىن نەمەسە وقۋ ورنىنان بەرىلگەن انىقتامانى (فوتوسۋرەتى بار) كورسەتۋگە ءتيىس.
قولدانىستاعى زاڭنامانىڭ تالابىنا سايكەس قالا ماڭىنداعى اۆتوبۋستاردا جول ءجۇرۋ بارلىق ازاماتتار, سونىڭ ىشىندە ازاماتتاردىڭ جەڭىلدىكتى ساناتىنا جاتاتىندار ءۇشىن دە اقىلى بولىپ تابىلادى. 7-دەن 15 جاسقا دەيىنگى بالالار ءۇشىن جولاقىنىڭ 50% تولەنەدى.
قالا ماڭىنا قاتىنايتىن جولاۋشىلارعا ىڭعايلى بولۋى ءۇشىن كولىك ايماقتارىنا بولىنگەن تاريفتىك جەلى ەنگىزىلەدى. مۇنداي ۋنيفيكاتسيا تاريفتەر ءتۇرىن 25-تەن 5-كە دەيىن قىسقارتۋعا, سونداي-اق ەلدى مەكەندەر ءۇشىن جولاقى قۇنىن 97%-عا, ورتا ەسەپپەن 44,5 تەڭگەگە تومەندەتۋگە مۇمكىندىك بەرەدى.
سونىمەن قاتار, كولىك كارتالارىن ساتۋ مەن تولىقتىرۋ جەلىلەرىن ۇيىمداستىرۋ بويىنشا جۇمىستار جۇرگىزىلىپ جاتىر. قالا ماڭىنداعى اۋىلداردىڭ تۇرعىندارى كولىك كارتالارىن اۆتوبۋس سالونىندا تىكەلەي جۇرگىزۋشىدەن ساتىپ الىپ, تولىقتىرا الادى. كولىك كارتاسى بولماعان جاعدايدا, جولاۋشى جولاقىسىن جۇرگىزۋشىگە نەمەسە كوندۋكتورعا قولما-قول اقشامەن تولەپ, بەلگىلەنگەن ۇلگىدەگى (QR-كودپەن) ءبىر رەتتىك قاعاز بيلەت الۋعا قۇقىلى.
اتاۋلى كولىك كارتالارىن پايدالاناتىن جولاۋشىلار باسقا دا ارتىقشىلىقتارعا يە. ولار قالا ماڭىنا قاتىنايتىن اۆتوبۋستاردان قالالىق جانە ەكسپرەسس مارشرۋتتارعا تەگىن اۋىسىپ وتىرا الادى. بۇل رەتتە جولاۋشى قالا ماڭىنا قاتىنايتىن اۆتوبۋستان شىعا بەرىستە كولىك كارتاسىن تەرمينالعا قويۋى كەرەك. سودان كەيىن كەيىن 60 مينۋتتىڭ ىشىندە ەكسپرەسس مارشرۋتقا نەمەسە قالالىق اۆتوبۋسقا وتىرادى.
زاڭناما تالاپتارىنا سايكەس, تەگىن جول ءجۇرۋ قۇقىعى استانا قالاسىندا تۇراتىن ازاماتتاردىڭ جەڭىلدىكتى ساناتىنا جاتاتىن تۇلعالارعا بەرىلەدى. الايدا, بۇگىندە اتالعان جەڭىلدىكتەردى بارشا رەسپۋبليكامىزدىڭ حالقى پايدالانىپ ءجۇر. زاڭنامامەن سايكەستەندىرۋ ءۇشىن اقمولا وبلىسىنىڭ اكىمدىگى استانا قالاسىنىڭ ماڭىنداعى ەلدى مەكەندەردە تۇرىپ جاتقان ازاماتتاردىڭ جەڭىلدىكتى ساناتىنا جاتاتىن تۇلعالاردىڭ جول ءجۇرۋىن قارجىلاندىرۋ ماسەلەسىن قارۋى كەرەك.
astana.gov.kz
