بۇگىن - قازاقستان پوليتسياسى كۇنى. وسىعان وراي ەسىل اۋدانىنىڭ اكىمى ءسابيلا مۇستافينا ەسىل اۋدانى ىشكى ىستەر باسقارماسىنىڭ جەرگىلىكتى پوليتسيا قىزمەتكەرلەرىن كاسىبي مەرەكەمەن قۇتتىقتادى.
قازاقستان پوليتسياسىنىڭ تاريحى تەرەڭدە جاتىر. 1992 جىلدىڭ 22 ماۋسىمىندا ەلباسى نۇرسۇلتان نازارباەۆ العاش رەت «ىشكى ىستەر ورگاندارى» تۋرالى زاڭعا قول قويعان بولاتىن. حالىقتىڭ تىنىشتىعىن كۇزەتىپ, قوعامدىق ءتارتىپتى قاداعالاۋدا پوليتسيانىڭ قوعامداعى ورنى ەرەكشە ەكەنى ەسكەرىلىپ, 2007 جىلى پرەزيدەنت جارلىعىمەن 23 ماۋسىم – «قازاقستان پوليتسياسى كۇنى» بولىپ رەسمي بەكىتىلدى. ال 2015 جىلى «100 ناقتى قادام» ۇلت جوسپارى اياسىندا ەلباسى جەرگىلىكتى پوليتسيا قىزمەتىن قۇرۋ تۋرالى زاڭعا قول قويعان ەدى. مىنە, سودان بەرى جەرگىلىكتى اتقارۋشى ورگانمەن تىعىز جۇمىس ىستەپ, تۇرعىنداردىڭ قاۋىپسىزدىگىنە بارىنشا قورعان بولىپ كەلەدى.
- قوعامدىق ءتارتىپتى قالىپتاستىرۋ, ەل تىنىشتىعىن قورعاۋ جولىنداعى قاجىرلى ەڭبەكتەرىڭىزدى حالىق بىلەدى. ويتكەنى, ءار ادامنىڭ قاۋىپسىزدىگى مەن ومىرىنە جاۋاپتىلىق تانىتاتىن سىزدەرسىزدەر. بۇگىن كاسىبي مەرەكە قارساڭىندا جەرگىلىكتى پوليتسيا قىزمەتكەرلەرىن شىن جۇرەكتەن قۇتتىقتايمىن. ءوز سالاسىنىڭ ناعىز ماماندارىنا تەك دەنساۋلىق, جاقسىلىق تىلەيمىن, دەدى ەسىل اۋدانىنىڭ اكىمى ءسابيلا مۇستافينا.
ول ەسىل اۋداندىق جەرگىلىكتى پوليتسيا قىزمەتىنىڭ 14 قىزمەتكەرىنە العىسحات تابىستاپ, ەكى تەلەديدار سىيعا تارتتى. ولاردىڭ قاتارىندا ءبولىم باستىعى باقداۋلەت ساحوۆ, پوليتسيا مايورى رينات جانعىلباەۆ, اعا ينسپەكتورلار ازامات وسپانوۆ, ءال-فارابي جورابەكوۆ, ينسپەكتورلار نۇرداۋلەت پەرنەشوۆ, ۋچاسكەلىك پوليتسيا ينسپەكتورلارى ايدوس مومبيەۆ, بەيبىت اسقارۇلى, ابزال قاسيبەك, نۇرلان مولدابەكوۆ, ايبەك تىنىباەۆ, بەرىك بەيسەنوۆ, اينۇر دانياربەكوۆا, ايدا ايدارقىزى, اقمارال تاجماعامبەتوۆالار بار.
«بۇگىن ءبىزدى ارنايى قابىلداپ, كاسىبي مەرەكەمەن قۇتتىقتاعان اۋدان باسشىسىنا العىس ايتامىز. ارينە, ىشكى ىستەر ورگاندارىندا قىزمەت ەتۋ ۇلكەن جاۋاپكەرشىلىكتى تالاپ ەتەدى. ەگەر ءوز كاسىبىڭدى ءبىلىپ, جانىڭداي جاقسى كورسەڭ, جەتىستىككە قيىندىقسىز جەتۋگە بولادى» دەيدى پوليتسيا ينسپەكتورى اقمارال باينيەتوۆا.
گۇلميرا شارحانقىزى
