اقمولالىق جاۋىنگەرلەر جايىندا جاڭا دەرەكتەر تابىلدى.
ەسكى ۆوكزالدىڭ پەررونىنا شىعىپ, سونا-اۋ جىلداردان سىر تارتقان عيماراتقا كوز سالىڭىزشى. كىشكەنە عانا قوڭىرقاي قوس تاقتاي نازارعا شالىنادى.وندا «بۇل جەردەن 1941 جىلى 387-اتقىشتار ديۆيزياسىنىڭ ەشەلوندارى ماسكەۋدى قورعاۋعا اتتاندى», «بۇل جەردەن 1941 جىلى تامىزدا 310-اتقىشتار ديۆيزياسى لەنينگرادتى قورعاۋعا اتتاندى» دەگەن الىس تا اۋىر ويلارعا تارتاتىن جازۋلار بار…
كوڭىلدىڭ كوك دونەنى جۇيرىك قوي. كوز الدىمىز لەزدە جۇپىنى سۋرەتتەرگە تولا كەتەدى الگىنى وقىعاندا. ول ديۆيزيالاردىڭ قۇرامىن, البەتتە, سارىارقانىڭ سايدىڭ تاسىنداي ساڭلاقتارى تولىقتىردى. ءبىرىنىڭ اناسى, ءبىرىنىڭ اكەسى, ءبىرىنىڭ سۇيگەن جارى…
ارقا ەرلەرىنىڭ قانشاسى الگى جەرگە امان ورالىپ, وتباسى مەن اۋلەتىن قۋانىشقا بولەدى ەكەن؟.. قانشاسى ماسكەۋ مەن لەنينگرادتىڭ ماڭىندا, نە بولماسا باسقا دا مايدان دالاسىندا جەر جاستاندى, قانشاسى ءىزىم-قايىم جوعالىپ كەتتى؟.. ول تۇسى اللاعا ايان. الايدا, كۇنى كەشە 387-اتقىشتار ديۆيزياسىنا قاتىستى قۇندى دەرەكتەر تاريح بەتتەرىنە قاتتالدى. تالاي جىلىن مۇراجاي ىسىنە ارناعان ءماريام كەنجەاحمەت ءبىزدىڭ جاۋىنگەرلەر قورعاعان شاھارلاردىڭ قوجاسى – رەسەيدىڭ پودولسك قالاسىنان ديۆيزيا جايىندا جازىلعان قۇجاتتامالاردى تاۋىپ, قازاقستاندىقتارعا ۇسىندى. ەندى ءوزىنىڭ جاۋىنگەر اتالارىن ىزدەگەن ازاماتتار وسى دەرەكتەرمەن جاقىن تانىسا الادى.
تاريحشىنىڭ ايتۋىنشا, 387-اتقىشتار ديۆيزياسى 1941 جىلى اقمولا وبلىسىندا قۇرىلعان. العاشقىدا ونىڭ قۇرامىندا اقمولالىق جانە قاراعاندىلىق ساربازدار شاقىرىلعان بولاتىن. سول جىلعى قاراشانىڭ ون بىرىندە ديۆيزيا ۇرىس دالاسىنا اتتاندى. «سۇراپىل سوعىس بىتكەنشە, تالاي مايدان الاڭىندا مىڭداعان قازاقستاندىق ەرلىكپەن قازا تاپتى. ولاردىڭ ەرلىكتەرى جايىندا «زا پوبەدۋ» جانە «سوۆەتسكي بوگاتىر» گازەتتەرىنە باسىلعان ەكەن كەزىندە. سول گازەتتەردىڭ پودولسك مۇراعاتىندا جاتقان بىرنەشە داناسىن قازاق دالاسىنا جەتكىزدىك» دەيدى م.كەنجەاحمەت.
سوعىس جىلدارى 387-اتقىشتار ديۆيزياسى ماسكەۋدى عانا قورعاپ قالعان جوق. تالاي قاندى قىرعىن شايقاستى باستان كەشىردى. سولاردىڭ ءبىرى 1942 جىلى 15 تامىزدا بولعان ەكەن. ول كەزدە ديۆيزيا اسكەرى جاۋدىڭ قورشاۋىندا قالىپ, سان-مىڭ اسكەردەن نەبارى سەگىز جۇزدەيى امان قالعان. ولاردىڭ ەسىمدەرى جازىلعان ءتىزىم كوكشەتاۋداعى تاريحي مۇراجايعا وتكىزىلدى. باتىر جاۋىنگەرلەردىڭ ۇرپاقتارى بابالارىنىڭ ەسىمى مەن دەرەكتەرىن سول جەردەن تابا الادى. بۇل دا بولسا – بۇگىنگى بۋىننىڭ جۇبانىشى, قۇندىلىعى.
اسحات رايقۇل
