№66 مەكتەپ-ليتسەيدىڭ وقۋشىلارى مەن ۇستازدارى اۋىر اتلەتيكادان وليمپيادا ويىندارىنىڭ ەكى دۇركىن چەمپيونى يليا يلينمەن كەزدەستى. «شاتتاندىرعان, ماقتاندىرعان سول كۇندەر» اتتى شارانىڭ ماقساتى – وقۋشىلاردىڭ سپورتقا دەگەن قىزىعۋشىلىقتارىن ارتتىرىپ, پاتريوتتىق سەزىمگە باۋلۋ.
باسقوسۋدا الدىمەن كوپشىلىككە داڭقتى سپورتشىنىڭ ومىردەرەگى تانىستىرىلدى. سەگىز جاسىندا وبلىستىق ارنايى بالالار مەن جاسوسپىرىمدەردىڭ وليمپيادالىق رەزەرۆتەرىن دايىنداۋ مەكتەبىنە قابىلدانعاننان سوڭ يليانىڭ سپورتتاعى جولى باستالادى. ول 2005-2006 جىلدارى-اق ەكى دۇركىن الەم چەمپيونى اتانعان.
جيىندى وقۋشىلاردىڭ «جاسا, قازاقستان!» اتتى سپورتتىق-مۋزىكالىق قويىلىمى جالعادى. مەكتەپ ديرەكتورى ايتجان شاياحمەتوۆا ەل نامىسىن تۋ ەتىپ كوتەرگەن سپورتشىعا جىلى لەبىزىن ءبىلدىرىپ, سىي-سياپات جاسادى. جەتكىنشەكتەر وليمپيادا چەمپيونىنا ساۋالدارىن قويىپ, جان-جاقتى جاۋاپ الدى.
لاريسا الدابەرگەنوۆا
