مەملەكەت باسشىسى نۇرسۇلتان نازارباەۆ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا «قازاق «تۋعان جەرگە تۋىڭدى تىك» دەپ بەكەر ايتپاعان. پاتريوتيزم كىندىك قانىڭ تامعان جەرىڭە, وسكەن اۋىلىڭا, قالاڭ مەن وڭىرىڭە, ياعني تۋعان جەرىڭە دەگەن سۇيىسپەنشىلىكتەن باستالادى» دەي كەلە, «تۋعان جەر» باعدارلاماسىن قولعا الۋدى ۇسىندى. ونىڭ ءمان-ماڭىزىن «تۋعان جەر – اركىمنىڭ شىر ەتىپ جەرگە تۇسكەن, باۋىرىندا ەڭبەكتەپ, قاز باسقان قاسيەتتى مەكەنى, تالاي جاننىڭ ءومىر باقي تۇراتىن ولكەسى. ونى قايدا جۇرسە دە جۇرەگىنىڭ تۇبىندە الديلەپ وتپەيتىن جان بالاسى بولمايدى» دەگەن سوزدەرمەن ءتۇسىندىرىپ ءوتتى.
سولتۇستىك قازاقستان وبلىسى جامبىل اۋدانىنداعى مايبالىق اۋىلىنىڭ قۇرىلعانىنا بيىل 90 جىل تولىپ وتىر. جۋىردا استانادا بۇل اۋىل تاريحىنان سىر شەرتەتىن «ورنى دارا, جۇرتى دانا مايبالىق» اتالاتىن كىتاپتىڭ تانىستىرىلىمى بولدى. بۇل كۇندە ەلوردادا وسى اۋىلدان شىققان 30 شاقتى شاڭىراق تۇرادى. ولاردىڭ اراسىندا ناۋان, ءانۋار, بورانباي ساريندەر دە بار. وسى اعايىندى ازاماتتار بىلتىر جارىق كورگەن اتالمىش كىتاپتى قوسىمشا باستىرىپ, باس قالاداعى جەرلەستەرىنە تاراتىپ بەردى.
«مايبالىق اۋىلىنان 3 شاقىرىم جەردە بارشا قازاققا ايگىلى گۇلتوبە-ماماناي دەپ اتالاتىن القاپتا قوجابەرگەن جىراۋ, تولىباي سىنشى, سەگىز سەرى جەرلەنگەن. قازاق ادەبيەتىنىڭ نەگىزىن قالاۋشى ءسابيت مۇقانوۆ, عابيت مۇسىرەپوۆ, سافۋان شايمەردەنوۆ سىندى جازۋشىلاردىڭ اتاقونىسى, كىندىگى كەسىلگەن مەكەنى – وسى جەر. وسىدان 10 جىل بۇرىن اۋىلىمىزدىڭ 80 جىلدىعىن اتاپ وتكەن بولاتىنبىز. سول كەزدە مايبالىق اۋىلىنىڭ 8 جىلدىق مەكتەبىنىڭ ديرەكتورى بولعان تاڭات سۇگىرباەۆ پەن اۋىلىمىزدىڭ تۋماسى, جۋرناليست احمەتجان قۋانتاەۆ كىتاپ جازۋدى باستادى. جەتى-سەگىز جىلدىڭ اينالاسىندا ماتەريالداردى جيناقتاپ, «ورنى دارا, جۇرتى دانا مايبالىق» كىتابى جارىق كوردى. كىتاپتىڭ تۇساۋكەسەرى بىلتىر كۇزدە پەتروپاۆل قالاسىنداعى ءسابيت مۇقانوۆ اتىنداعى وبلىستىق كىتاپحانادا ءوتتى» دەيدى ناۋان سارين.
