نۇر-سۇلتان قالاسىندا «ادال جۇرەك» قايىرىمدىلىق مارافونى ۇيىمداستىرىلدى. بۇل ءىس-شاراعا 1500-دەن اسا استانالىقتار مەن قالا قوناقتارى قاتىستى.
«استانا – ادالدىق الاڭى» جوبالىق كەڭسەسى قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ نۇر-سۇلتان قالاسى بويىنشا دەپارتامەنتى جانە نۇر-سۇلتان قالاسى مادەنيەت جانە سپورت باسقارماسىمەن بىرلەسىپ وتكىزگەن قايىرىمدىلىق جۇگىرۋگە قاتىسۋشىلاردان ەرىكتى تۇسكەن جارنا قاراجاتى ونكولوگيالىق اۋرۋعا شالدىققان بالالاردىڭ ەمدەلۋىنە جۇمسالاتىن بولادى. قايىرىمدىلىق شاراعا قاتىسقان قر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ باسشىسى, وليمپيادا ويىندارىنىڭ چەمپيونى سەرىك ساپيەۆ قاتىسۋشىلارعا ساتتىلىك تىلەپ, وسىنداي ىزگىلىككە باعىتتالعان سپورتتىق شارالارعا قولداۋ ءبىلدىرەتىنىن ايتتى. ال نۇر-سۇلتان قالاسى اكىمىنىڭ ورىنباسارى باقتيار ماكەن «كومەككە ءزارۋ بالالاردىڭ مۇددەسىن كوزدەيتىن وسىنداي ءىس-شارالاردى ۇيىمداستىرعانىمىز – بۇل ءبىزدىڭ ۇلكەن جەڭىسىمىز. نۇر-سۇلتان قالاسىنىڭ اكىمدىگى وسىنداي ماقساتتى كوزدەيتىن قوعامدىق باستامالاردى قولدايدى ءارى كومەك كورسەتۋگە ءازىر ەكەنىن ايتقىم كەلەدى. بالالاردىڭ كۇلكىسى مەن ولاردىڭ بولاشاققا دەگەن سەنىمى بارىنەن قىمبات. سوندىقتان باستاما كوتەرۋشىلەر مەن ۇيىمداستىرۋشىلارعا ريزاشىلىعىمىزدى بىلدىرەمىز» دەپ تىلەگىن جەتكىزدى.
ال جۇگىرۋگە قاتىسقاندار اراسىندا 68 جاسار نۇرعالي ناراباەۆ پەن 64 جاستاعى يرينا مۇستافيناعا كوپشىلىك قۇرمەت ءبىلدىردى. 6 جاستاعى ءازيزا مەن 5 جاستاعى اسادوللا دا قايىرىمدىلىق جاساۋشىلاردىڭ قاتارىنان كورىندى.
